ئاسایشی ناوخۆی حەلەب: ئاگربەست تەنیا بۆ ڕزگارکردنی بریندارەکان بوو؛ هەرگیز تەسلیم نابین

ئاڤا نیوز

ئاسایشی حەلەب دوای گواستنەوەی هێزەکانی بۆ باکوور و ڕۆژهەڵاتی سووریا ڕایگەیاند، لە پێنج ڕۆژی هێرشی سوپای عەرەبی سووریا بۆ سەر گەڕەکە کوردییەکانی حەلەب، ئەوان بەرگرییەکی شکۆمەندانەیان کرد و بەهیچ شێوەیەک خۆیان ڕادەستنەکرد، بەوەش ڕێگرییان لە کۆمەڵکوژی خەڵک کرد.

چیرۆکی سەرەکی: ڕۆژی 6ـی ئەم مانگە هێرشی سوپای عەرەبی سووریا بۆسەر گەڕەکە کوردییەکانی حەلەب دەستی پێکرد، دوای پێنج ڕۆژ لە بەرگریی لەلایەن هێزەکانی ئاسایشی ناوخۆی حەلەب ئاگربەستێکی کاتی بۆ گواستنەوەی هاووڵاتییانی مەدەنی و برینداران ڕاگەیێنرا. 

ڕاگەیێنراوی فەرمی: ناوەندی ڕاگەیاندنی ئاسایشی شێخ مەقسوود:  گرووپە چەکدارەکانی سەر بە دیمەشق بە پشتیوانی فڕۆکەی چاودێری تورکیا، بە زرێپۆش و هەموو جۆرە چەکێکی قورس و بەبەشداریی هەزاران "چەتە" هێرشێکی دڕندانەیان کردەسەر گەڕەکی شێخ مەقسوود، ئەویش بە ئامانجی کۆمەڵکوژی خەڵک و گۆڕینی دیمۆگرافیای گەڕەکەکە، بەڵام هێزەکانیان بڕیاری بەرگرییاندا و بەهیچ شێوەیەک خۆیان ڕادەست نەکرد، لەو پێناوەشدا چەندین شەهیدیان بەخشی.

زانیاریی زیاتر: هەر لە ڕاگەیێنراوەکەدا هاتووە، لە کۆتا ساتەکاندا کە هێرشێکی تووند کرایەسەر گەڕەکەکە، بریندارەکان لە نەخۆشخانەی خالید فەجر چارەسەر دەکران، بەڵام ئەم نەخۆشخانەیەش بە چەکی قورس و درۆنی بەیرەکداری تورکی کرایە ئامانج بۆ کۆمەڵکوژی خەڵکەکەی.

٠ دوابەدوای ئەمە ئاگربەستێکی کاتی ڕاگەیێنرا تا کۆمەڵکوژی زیاتر نەکرێت و بریندار، مەدەنییەکان، ئافرەتان و منداڵ بۆ شوێنێکی ئارام بگوازرێنەوە لەبەرامبەریشدا هێزەکانیان نەخۆشخانەکەیان چۆڵکرد و بەهەستیارییەوە مامەڵەیان کرد.

٠ "لێرەش بەدواوە بەردەوامی بە خەبات بۆ پاراستنی ئیرادەی ئازادی گەل دەدەین و بۆ بەردەوامیدان بەم خەباتە لەهەموو هۆیەکی بەردەست کەڵک وەردەگرین".