دەزگای خێرخوازیی بارزانی: زیاتر لە 150 هەزار کەس لە شێخ مەقسوود و ئەشرەفییە ئاوارەبوون

ئاڤا نیوز

 

دەزگای خێرخوازیی بارزانی ئاماژە بۆ ئەوە دەکات بەپێی زانیارییە سەرەتاییەکان زیاتر لە 150 هەزار کەس لە هەردوو گەڕەکی شێخ مەقسوود و ئەشرەفییە لە شاری حەلەب ئاوارەبوونە و بەشی زۆرییان ڕوویان لە عەفرین کردووە.

 

چیرۆکی سەرەکی: بەهۆی هێرشی سوپای عەرەبی سووریا بۆ سەر هەردوو گەڕەكی کوردنیشنی حەلەب، (ئەشرەفییە و شێخ مەقسوود) بە هەزاران کەس ئاوارەبوون و بە دەیان کەسیش لە هێزەکانی ئاسایشی ناوەخۆ و هاووڵاتیانی سڤیل گیانیان لە دەست دا. 

 

لێدوانی فەرمی: موسا ئەحمەد، سەرۆکی دەزگای خێرخوازیی بارزانی بە ئاڤای گوت: "بەپێی ئامارە سەرەتاییەکان 150 هەزار کەس لە هەردوو گەڕەکی شێخ مەقسوود و ئەشرەفییەی شاری حەلەب ئاوارەبوون، بەشێکی زۆری ئاوارەکان ڕوویان لە شاری عەفرین کردووە، بەجۆرێک تا ئێستا نزیکەی 23 هەزار خێزانی ئەو دوو گەڕەکە ئاوارەی عەفرین بوونە."

 

موسا ئەحمەد، دەشڵێت: "ئاوارەکانی کوردی هەردوو گەڕەکی شێخ مەقسوود و ئەشرەفییە لە بارودۆخێکی زۆرخراپ و سەختدان، دەزگای خێرخوازیی بارزانی، لە ڕێگەی نووسینگەی خۆی لە عەفرین هاوکاری مرۆیی پێشکەشی ئاوارەکان دەکات."

 

٠ خزمەتگوزاریی تەندروستی، خواردنی گەرم، پاکێجی خۆراک و  پێدوایستییەکانیانیان بۆ دابین دەکەین.

 

٠ قۆناغ بە قۆناغ بەردەوام دەبین لە پێشکەش کردنی هاوکاری مرۆیی بە ئاوارەکان لە عەفرین، بۆ ئەم مەبەستەش لەگەڵ ڕێکخراوە نێودەوڵەتییەکان لە پەیوەندی بەردەوام داین.

 

ئەوەی پێویستە بیزانیت: لە دوای بومەلەرزەکەی ساڵی 2023ـی سووریا، دەزگای خێرخوازیی بارزانی نووسینگەی لە شاری عەفرین کردووەتەوە و بەردەوام هاوکاری پێشکەشی خەڵکی ئەو سنوورە و ئاوارەکان دەکات.