لە قەڵادزێ هەوڵی دزینی بگۆڕێکی کارەبا دراوە

ئاڤا نیوز

شەوی ڕابردوو لە سنووری قەزای قەڵادزێ، هەوڵی دزینی بگۆڕێکی (محاویلە) کارەبا دراوە، بەڵام نەتوانراوە بگۆڕەکە ببردرێت؛ هێزەکانی پۆلیس و ئاسایش دەستیان بە لێکۆڵینەوە کردووە.

ڕاگەیێنراوی فەرمی: وەزارەتی کارەبای هەرێمی کوردستان بڵاوی کردووەتەوە، شەوی ڕابردوو لە سنووری پشدەر، چەند کەسێک هەوڵیان داوە بگۆڕێکی کارەبا بدزن کە لە گردی حوسنی بۆ بیری غاباتی قەڵادزێ دانراوە.

٠ وەزارەتی کارەبا ئاماژەی بۆ ئەوە کردووە، ئەو کەسانە دوای ئەوەی هەموو پێداویستییەکانی بگۆڕەکە لێ دەکەنەوە و دەیخەنە خوارەوە، بەڵام ناتوانن بیبەن؛ دواتر تیمەکانی کارەبا بگۆڕەکەیان بۆ هۆبەی کارەبای قەڵادزێ گواستووەتەوە.

زانیاریی زیاتر: بەپێی ڕاگەیەنراوەکەی وەزارەتی کارەبا، هێزەکانی ئاسایش و پۆلیس سەرقاڵی لێکۆڵینەوە و بەدواداچوونن بۆ دۆزینەوەی بکەران و ڕادەستکردنیان بە یاسا.