بەهۆی خۆپیشاندانەکانەوە 260 هاووڵاتی کورد لە ئێران دەستگیرکراون

ئاڤا نیوز

 

دوو هەفتەیە خۆپیشاندانەکان لە ئێران بەردەوامە سەرەڕای دەستگیرکردنی خۆپیشاندەران و ڕووبەڕووبونەوەیان لەگەڵ هێزە ئەمنییەکان بەڵام شەوان لە زۆربەی شارەکان خۆپیشاندانی گەرو بەڕێوەدەچێت.

 

بڵاوکراوەی فەرمی: ڕێکخراوی مافی مرۆڤی هەنگاو، ڕایگەیاند، بەپێی ئەو داتایانەی کە لە ناوەندی ئامار و بەڵگەنامەکانی ڕێکخراوی مافی مرۆڤی هەنگاو کۆکراونەتەوە، لە ماوەی دوو هەفتەی ڕابردوودا زیاتر لە دوو هەزار و 500 هاووڵاتی لە ئێران دەستبەسەر کراون.

 

ژمارەکان وادەڵێن: بەگوێرەی زانیارییەکانی هەنگاو، تا ئێستا ناسنامەی 700 کەس بۆ هەنگاو پشتڕاست کراوەتەوە. لانیکەم 85 کەسیان ژن و 60 کەسیشیان منداڵی تەمەن کەمتر لە 18 ساڵن، لەو ژمارەیە 260 کەسیان هاووڵاتیی کورد و 233 کەسیشیان هاووڵاتیی لوڕن، خەڵکی لوڕستانن. 

 

زانیاریی زیاتر: هەروەها دەربارەی گیان لەدەستدان ڕایگەیاند کە 116 کەس گیانیان لەدەستداوە ئەم ئامارە لە کاتێکدایە کە شەممە پزیشکێک کە نەیویستووە ناوی بهێنرێت بۆ ڕۆژنامەی تایمی ئێرانی ڕایگەیاندوو کە تەنیا شەوی ڕابردوو لە شەش نەخۆشخانە لە تاران گیانلەدەستدانی 217 کەس ڕاگەیێنراوە.