ئەو پێشمەرگانەی لە بازگەیەکی سنووری سەڵاحەددین دەستگیرکرابوون؛ ئازادکران

ئاڤا نیوز

پێشنیوەڕۆی ئەمڕۆ ژمارەیەک پێشمەرگە لە بازگەیەکی سنووری سەڵاحەددین لەلایەن سوپای عێراقەوە دەستبەسەر کران و دوای دوو کاتژمێر ئازاد کران.

چیرۆکی سەرەکی: ئەمڕۆ یەکشەممە 11-01-2026، لە بازگەی "خدر وەلی" لە قەزای دووزخورماتوو، 10 پێشمەرگەی لیوای 9 لە کاتی گەڕانەوەیان لە دەوامی فەرمی لە قادر کەرەم، لەلایەن سوپای عێراقەوە دەستبەسەر کران. هۆکاری دەستبەسەرکردنیان بۆ "پێبوونی چەک و کەرەستەی سەربازی" بەبێ هەماهەنگیی پێشوەختە گەڕێندراوەتەوە.

زانیاریی زیاتر: بەگوێرەی بەدواداچوونی ئاڤا، پێویستە هەر پێشمەرگە یان پۆلیسێک لەو بازگەیە هاتووچۆ بکات، پێشتر ڕەزامەندیی فەرماندەییی ئۆپەراسیۆنە هاوبەشەکانی وەرگرتبێت و ژمارەی چەکەکەی لە بازگەکە تۆمار کرابێت.

لێدوانی فەرمی: یاسین محەممەد، ئەندامی ئەنجومەنی پارێزگای سەڵاحەددین بە ئاڤای گوت: "ئەو پێشمەرگانە ئازاد کراون؛ مەرجە هەموو کارمەندە ئەمنییەکان چەک و زانیارییەکانیان پێشتر بۆ فەرماندەییی ئۆپەراسیۆنە هاوبەشەکان نێردرابێت بۆ ئەوەی ڕێگەیان پێ بدرێت."

زانیاریی تایبەت: سەرچاوەیەک لە وەزارەتی پێشمەرگە بە ئاڤای ڕاگەیاند، هەماهەنگی لەنێوان ئەوان و بەغدا هەیە و هەر دەستبەسەرکردنێک بەهۆی نەبوونی ناوی پێشوەختەوە بێت، دەستبەجێ لە ڕێگەی پەیوەندییەوە چارەسەر دەکرێت و ڕێگەیان پێ دەدرێت تێپەڕ بن.