ڕوانگەی سووری: لە حەلەب تاوانی گەورە بەرامبەر کورد کراوە

ئاڤا نیوز

سەرۆکی ڕوانگەی سووری بۆ مافەکانی مرۆڤ ئاماژە بەوە دەکات، تاوانی گەورە بەرامبەر بە کورد لە حەلەب کراوە، ئەوەی لە سووریا ڕوودەدات جەنگی ناوخۆییە.

چیرۆکی سەرەکی: لە ئەنجامی هێرش و بۆردوومانەکانی سوپای عەرەبی سووریا بۆ سەر هەردوو گەڕەکی زۆرینە کوردنشینی ئەشرەفییە و شێخ مەقسوود لە حەلەب، ژمارەیەکی زۆری هاووڵاتیان ئاوارە بوون و ژمارەیەکیشیان شەهید و بریندار بوون، جگە لە شەهید بوونی دەیان ئەندامی هێزەکانی ئاسایشی ناوخۆ.

لێدوانی فەرمی: ڕامی عەبدولڕەحمان، سەرۆکی ڕوانگەی سووری بۆ مافەکانی مرۆڤ ڕایگەیاند: ڤیدیۆی تۆمارکراومان لایە، چەکدارانی سوپای سووریا تەرمەکان دەسووتێنن و گەنج و منداڵ دەستگیر دەکەن و ئەشکەنجەیان دەدەن و دواتر خۆشحاڵی خۆیان بە ئاهەنگ گێڕان دەردەبڕن.

ئەوەشی ئاشکرا کرد، هێزەکانی هەسەدە لە گەڕەکەکانی ئەشرەفیە و شێخ مەقسوود نین، تەنیا ‌هێزەکانی ئاسایشی ناوخۆ لەوێن، لە ئەنجامی هێرشەکان 50 ئەندامی ئاسایش کوژراون، بەشێکیان تەرمەکانیان سووتێنراون، تەنانەت یەکێکیان دڵی دەرهێنراوە. 

سەرۆکی ڕوانگەکە دەڵێت: دۆخەکە سەختە، تاوان لە شێخ مەقسوود ئەنجامدراوە، تەحەددای حکومەتی سووریا دەکەم لیژنەیەکی لێکۆڵینەوەی نێودەوڵەتی پێکبهێنێت بۆ ئاشکراکردنی ڕاستییەکان و لێکۆڵینەوە لەوەی ئایا هێزەکانی هەسەدە ناوچە مەدەنییەکانی کردووەتە ئامانج و خەڵکی مەدەنی لە حەلەب کوشتووە یان نا.

لەلایەکی دیکەوە: ڕامی عەبدولرەحمان ئاماژە بۆ پێشهاتێکی مەترسیدار دەکات و جەخت لەوە دەکاتەوە، "ئەوەی ئەمڕۆ جێی نیگەرانیی ئێمەیە ئەوەیە سووریا تێوەگلاوە لە شەڕێکی ناوخۆدا و لە کۆمەڵگەی نێودەوڵەتیدا  دوو ڕووی هەیە. ئەم زنجیرەیە دەستدرێژییانە لە کەناراوەکانی سووریا بە کوشتنی عەلەوییەکان دەستیپێکرد، پاشان درووزەکان لە سوەیدا کۆمەڵکوژ کراون ئینجا نۆرەی کورد هات."