ئاڤای خەڵک؛ ئاوەڕۆیەک بووەتە کێشە بۆ دانیشتووانی مەلائۆمەر

ئاڤا نیوز

بەهۆی بارانبارینی چەند ڕۆژی ڕابردوو و تەسکیی سیستەمی ئاوەڕۆوە، ئاو چووەتە نێو ژمارەیەک ماڵ لە کۆمەڵگەی مەلائۆمەری هەولێر، پارێزگاریش ڕایدەگەیەنێت پڕۆژەی چارەسەرکردنی ئاوەڕۆکە ئامادەیە و جێبەجێکردنی تەنیا پێویستی بە بودجە هەیە.

چیرۆکی سەرەکی: شەپۆلی بارانبارینی دوو ڕۆژی ڕابردوو بووەتە هۆی ئەوەی ئاو بچێتە نێو چەند ماڵێک لە کۆمەڵگەی مەلائۆمەر لە هەولێر. هۆکاری سەرەکیی ئەم کێشەیە بۆ زێرابێکی سەراوە دەگەڕێتەوە کە بە نێو ماڵەکاندا تێدەپەڕێت و تەسکیی ژێر پردێکیش لە ناوچەکەدا بووەتە هۆی کۆبوونەوەی ئاو بۆ ناو ماڵان.

زانیاریی بەدەستهاتوو: دانیشتووانی ناوچەکە دەڵێن ساڵانە لە زستاناندا ڕووبەڕووی مەترسیی لافاو دەبنەوە و لە هاوینانیشدا بەدەست بۆنی ناخۆشی زێرابەکەوە دەناڵێنن.

لێدوانی فەرمی: ئومێد خۆشناو، پارێزگاری هەولێر سەبارەت بەم کێشەیە ڕایگەیاند: "پڕۆژەکە ئامادەکراوە و ئاوەڕۆی سندووقی دروست دەکرێت، ڕەزامەندیش بۆ جێبەجێکردنی دراوە، بەڵام قەیرانی دارایی و نەبوونی پارە ڕێگر بوونە لەبەردەم جێبەجێکردنی."

وتیشی: "هەر کاتێک پارە بەردەست بوو ئەم پڕۆژەیە لە ئەولەویەتی کارەکانمانە و جێبەجێی دەکەین."