لەپێناو کوردانی حەلەب دایکانی ئاشتی بەرەو ئەنقەرە بەڕێ دەکەون

ئاڤا نیوز

تا دێت کاردانەوەکان بەرامبەر هێرشی گروپە چەکدارەکانی سەر بە سوپای عەرەبی سووریا بۆ سەر گەڕەکە کوردییەکانی حەلەب زیاتر دەبێت و دایکانی ئاشتییش ئەمڕۆ لە چەندین شاری تورکیا و باکووری کوردستان، بۆ ڕاگرتنی ئەم هێرشانە بەرەو ئەنقەرەی پایتەختی تورکیا بەڕێ دەکەون.

چیرۆکی سەرەکی: دوێنێ دایکانی ئاشتی لە ئامەد، ئێلهـ، مێردین، شرنەخ، ئەدەنە، مێرسین و ئیزمیر گردبوونەوە و ڕایاگەیاند ناتوانن دەستەوەستان دابنیشن بەرامبەر هێرشکردن و کوشتنی خوشک و برا کوردەکانیان لە حەلەب، تورکیاش بەوە تۆمەتبار دەکەن بە هاوکاری ئەو گروپانەی هێرشیان کردە سەر گەڕەکەکانی ئەشرەفییە و شێخ مەقسوود.

زانیاریی زیاتر: بڕیارە ئەمڕۆ بە مەبەستی ڕاکێشانی سەرنجی ڕای گشتیی تورکیا، دایکانی ئاشتی بەرەو ئەنقەرە بەڕێ بکەون و بانگەشەی ئەوە دەکەن گوایە ئەم هێرشانە لە ئەنقەرە پلانی بۆ دانراوە بۆیە ڕوو لەوێ دەکەن.

ئەوەی پیویستە بیزانیت: ڕێکخراوی دایکانی ئاشتی لە 1999 دامەزراوە، لە زۆربەی شارەکانی باکووری کوردستان و تورکیا چالاکە و بە پێویستی دەزانێت کێشەکان بە ڕێگاچارەی ئاشتییانە و دیالۆگ چارەسەر بکرێن، چونکە جەنگ تەنیا دەبێتە هۆی ماڵوێرانی و کەس تیایدا براوە نابێت.

ئەندامانی ڕێکخراوەکە لەو دایکانە پێک هاتووە لە کاتی شەڕوپێکدادان لە نێوان سوپای تورکیا و پەکەکە ڕۆڵەکانیان گیانیان لەدەست داوە.