یەکەم دادگایی لاهوور شێخ جەنگی و پۆڵادی برای بەڕێوەچوو

ئاڤا نیوز

پێشنیوەڕۆی ئەمڕۆ دووشەممە، یەکەم دادگایی لاهوور شێخ جەنگی، پۆڵاد شێخ جەنگی و 10 لە هاوڕێکانیان لە دادگای سلێمانی بەڕێوەچوو لەنێویاندا ڕێبوار حامی حاجی، بڕیاردرا دۆسیەکە بگوازرێتەوە دادگای پێداچوونەوەی هەرێمی کوردستان.

لێدوانی فەرمی: بورهان ڕەشید گوڵە، سەرۆكی دەستەی پارێزەرانی لاهوور شێخ جەنگی؛ بە ئاڤای گوت، "دادگاییەکە بۆ ماوەی نیو کاتژمێر بەردەوام بوو، سکاڵاکار کە بافڵ تاڵەبانییە و پارێزەرانی لە دادگا ئامادە نەبوون تەنیا ئیفادەکەی خوێنرایەوە، دواتر لاهوور شێخ جەنگی و پۆڵاد شێخ جەنگی گوێزرانەوە زیندانی ئاسایش، بەشێکی دیکەیان بۆ کانی گۆمە و هەندێکشیان بۆ زیندانی دژە تیرۆر."

گوتیشی، "بەگوێرەی ماددەکانی 54 و 142 لە (اصول المحاکمات الجزائیة) ئەگەر دوو هۆکار هەبوو لەوانە بەهۆی بارودۆخی ئەمنی و سەلامەتی لێکۆڵینەوە، دەتوانرێت داوای گۆڕینی شوێنی دادگایی بکرێت، ئەو کەیسە هەردوو هۆکاری هەبووە بۆیە داوای گواستنەوەی دۆسیەکە کراوە."

زانیاریی زیاتر: بەگوتەی سەرۆكی دەستەی پارێزەرانی لاهوور شێخ جەنگی، کۆتایی ئەم هەفتەیە ڕێککارەکانی گواستنەوەی دۆسیەکە، بۆ دادگای پێداچوونەوەی هەرێمی کوردستان تەواو دەبێت، دواتر لەو دادگایە بڕیار دەدرێت دادگاییەکە لە سلێمانی بکرێت یان بگوازرێتەوە هەولێر.

باکگراوند: شەوی 22ـی ئابی ساڵی ڕابردوو، هێزێکی زۆری کۆماندۆی یەکێتی هەڵیکوتایە سەر شوێنی حەوانەوەی لاهوور شێخ جەنگی، سەرۆکی بەرەی گەل، دوای سێ کاتژمێر شەڕکردن، لاهوور شێخ جەنگی و پۆڵادی برای دەستگیرکران و تا ئێستا لە زیندانن.