سوپای عەرەبی سووریا هۆشداریی تووند دەداتە هەسەدە

 

دەستەی ئۆپەراسیۆنەکانی سوپای عەرەبی سووریا ڕایدەگەیێنێت، جووڵەیەکی بەرفراوانی هێزەکانی سووریای دیموکرات (هەسەدە)ـیان لە گوندەوارەکانی ڕۆژهەڵاتی حەلەب تۆمار کردووە و هۆشداری دەدەن کە هەر هەنگاوێکی سەربازی لەلایەن هەسەدەوە بکرێت وەڵامێکی زۆر تووندیان دەبێت.

 

چیرۆکی سەرەکی: پێنج ڕۆژە هێرش و بۆردوومانەکانی سوپای عەرەبی سووریا بۆ سەر هەردوو گەڕەکی ئەشرەفییە و شێخ مەقسوود لە حەلەب بەردەوام بووە، بەم هۆیەوە ژمارەیەکی زۆری هاووڵاتیان شەهید و بریندار بوون، بەپێی ئامارە سەرەتاییەکان 150 هەزار کەس لە هەردوو گەڕەک ئاوارەبوون. 

 

 

 

 

سوپای عەرەبی سووریا دووپاتی کردەوە کە هەر جووڵەیەکی سەربازیی ئەو گرووپانە بە پەرچەکردارێکی تووند وەڵام دەدرێتەوە و دەڵێت: "لە ئاست ئەم گرژییە مەترسیدارەدا بە هیچ شێوەیەک دەستەوستان نامێنینەوە".

 

 

لێدوانی لایەنی بەرامبەر: هێزەکانی سووریای دیموکرات (هەسەدە) لە ڕاگەیێنراوێکدا جەختی لەوە کردەوە، هیچ ئامادەکارییەکی نائاسایی لە ئارادا نییە و ئەو کۆبوونەوانەی بینراون، تەنیا هاووڵاتییانی مەدەنی باکوور و ڕۆژهەڵاتی سووریا بوون کە بۆ پێشوازیکردن لە بریندارەکانی شێخ مەقسوود و ئەشرەفییە کۆببوونەوە، نەک بۆ مەبەستی سەربازی.

 

 

زانیاریی زیاتر: بەپێی زانیارییە هەواڵگرییەکانی سوپا، هەسەدە هێزێکی زۆری لە ناوچەکانی مەسکەنە و دێر حافر کۆکردووەتەوە، ئەم هێزە نوێیانە ژمارەیەک چەکداری (پەکەکە) و پاشماوەکانی ڕژێمی پێشوویان تێدایە.