دادگای سلێمانی جارێکی دیکە ڕەتیکردەوە شاسوار عەبدولواحید ئازاد بکات

 

 

دادگای سلێمانی بۆ جاری دووەم ئازادکردنی شاسوار عەبدولواحیدی  ڕەتکردەوە، سەرەڕای تەواوبوونی ماوەی یاسایی لە زیندان بەڵام دۆسیەی دیکەی لەسەر ماوە و ئازاد نەکرا. 

 

 

چیرۆکی سەرەکی: دوای پێنج مانگ لە زیندانیکردنی، ئەمڕۆ شاسوار عەبدولواحید، سەرۆکی جووڵانەوەی نەوەی نوێ ماوەی یاسایی مانەوەی لە زیندان کۆتایی هات، هەرچەندە پارێزەرەکەی؛ سەرجەم مامەڵەکان و ڕێکارەکانی ئازادکردنی تەواوکردووە، بەڵام بەهۆی ئەوەی، شاسوار عەبدولواحید کۆمەڵێک دۆسیەی دیکەی لەسەر ماوە و ئازاد نەکرا.

 

 

زانیاریی پەیامنێر: چۆمان مەحموود، پەیامنێری ئاڤا، لە سلێمانی ڕایگەیاند، شاسوار عەبدولواحید کۆمەڵێک دۆسیەی دیکەی لەسەر ماوە و ئازاد ناکرێت، لەسەر ئەو دۆسیانە دادگایی دەکرێت. لەماوەی ڕابردوودا لە دادگای سلێمانی چەندین سکاڵای دیکەی لەسەر تۆمارکراون و تا ئێستا یەکلایی نەکراونەتەوە.

 

 

زانیاریی زیاتر: شاسوار عەبدولواحید، سەرۆکی جووڵانەوەی نەوەی نوێ لە 12ـی مانگی ئابی ساڵی ڕابردوو دەستگیر کراوە، لەسەر سکاڵایەک بە پێی ماددەی دووی یاسای خراپ بەکارهێنانی ئامێرەکانی پەیوەندی پێنج مانگ زیندانی بەسەردا سەپێنراوە و ئەو ماوەیەی تەواو کردووە. هاوکات زیاتر لە 80 سکاڵای دیکەیشی لەسەر تۆمار کراوە.