تۆمەتبارانی تەقینەوەکەی حومس دەستگیر کران

ئاڤا نیوز

وەزارەتی ناوخۆی سووریا دەستگیرکردنی دوو ئەندامی داعشی ڕاگەیاند، کە بەرپرسن لە تەقینەوە خوێناوییەکەی مانگی ڕابردووی ناو مزگەوتی ئیمام عەلی لە شاری حومس.

وێنە گەورەکە:  ئاشکراکردنی شانە نووستووەکانی داعش لە شارە گەورەکانی وەک حومس، نیشانەی ئەوەیە کە سەرەڕای لاوازبوونی ڕێکخراوەکە، هێشتا مەترسیی کردەوە تێرۆریستییەکان بۆ سەر ناوچە مەدەنییەکان ماوەتەوە.

ڕاگەیێنراوی فەرمی: ئەمڕۆ دووشەممە، وەزارەتی ناوخۆی سووریا ڕایگەیاند: یەکە ئەمنییەکان لە پارێزگای حومس، بە هاوکاریی دەزگای هەواڵگری گشتی، ئۆپەراسیۆنێکی ئەمنییان ئەنجامدا و ئەحمەد عەتاڵڵا دیاب و ئەنەس زەرادیان دەستگیرکرد کە سەر بە ڕێکخراوی تیرۆریستی داعشن و بەرپرسن لە تەقینەوەکەی مزگەوتی ئیمامی عەلی.

- لە شوێنی دەستگیرکردنیان دەست بەسەر بۆمبی چێنراو، چەکی جۆراوجۆر و بەڵگەی دیجیتاڵیدا گیراوە، کە تێوەگلانیان لە کردەوەکەدا دەسەلمێنێت.

ئەوەی پێویستە بیزانیت: ڕووداوەکە دەگەڕێتەوە بۆ ڕۆژی 26ـی کانوونی یەکەمی 2025؛ لە کاتی نوێژی هەینیدا، تەقینەوەیەک مزگەوتی "ئیمام عەلی بن ئەبی تالیب"ی لە گەڕەکی "وادی زەهەب" هەژاند، کە بووە هۆی کوژرانی 8 هاووڵاتی و برینداربوونی 20ـی دیکە.