سەرۆک بارزانی: تاوانی کەسێک مەخەنە ئەستۆی کەسێکی تر

ئاڤا نیوز

سەرۆک بارزانی لە پەیامێکی بەپەلەدا، سەرکۆنەی ئەو هەڵمەتانە دەکات کە لە هەندێک میدیا و سۆشیاڵ میدیا دژی هاووڵاتییانی عەرەبی سووریا لە ناو هەرێمی کوردستان دەستی پێکردووە؛ جەختیش دەکاتەوە کە ئەم ڕەفتارانە دژی "بەهاکانی گەلی کوردستانن".

وێنە گەورەکە: پاش ڕووداوە خوێناوییەکانی حەلەب و ئەو پێشێلکارییانەی بەرامبەر کورد لەوێ ئەنجام دران، شەپۆلێکی ناڕەزایەتی لە سۆشیاڵ میدیا بەرامبەر پەنابەرانی عەرەبی سووریا لە هەرێمی کوردستان دروست بوو.

بۆچی گرنگە: هەرێمی کوردستان وەک "پەناگەی ئارام" لە ناوچەکەدا دەناسرێت. ماوەی چەند ساڵێکە باوەشی بۆ هەزاران ئاوارەی دەرەوەی کوردستان کردووەتەوە ئەمەش لەلایەن کۆمەڵگەی نێودەوڵەتییەوە گرنگییەکی زۆر پێدراوە.

ڕاگەیێنراوی فەرمی: سەرۆک بارزانی لە پەیامەکەیدا ڕایگەیاند: "دەبێ ڕێزی ئەو پەنابەر و هاووڵاتییە عەرەبە سووریاییانە بگیرێت کە پەنایان بۆ هەرێمی کوردستان هێناوە؛ پێویستە کۆتایی بەم هەڵمەتە نابەجێیە بهێندرێت و ڕێگە لە دووبارەبوونەوەی بگیرێت."

٠ لە كاردانەوە بەرانبەر ڕووداوەكانی چەند ڕۆژی ڕابردووی شاری حەلەب، بەداخەوە لە هەندێک پێگەی میدیایی و سۆشیاڵ میدیا و ناوەندی تردا، هەڵمەتێك لە دژی ئەو هاووڵاتییە عەرەبە سووریاییانە دەبینرێت كە لە هەرێمی كوردستاندا دەژین.

٠ ئەم جۆرە هەڵمەت و ڕەفتارانە لە جێی خۆیدا نین و بە هیچ شێوەیەك لەگەڵ پڕەنسیپ و بەهاكانی گەلی كوردستان ناگونجێن و دژی سیاسەت و ڕوانگەی گشتیی دامودەزگەی هەرێمی كوردستانن.

٠ لە ڕاستیدا نابێ ئۆباڵی ئەنجامدانی تاوان لەلایەن خەڵكێكەوە بخرێتە ئەستۆی خەڵکانێکی دیکەوە كە هیچ پەیوەندییان بە تاوانەكەوە نەبووە.

٠ دەبێ ڕێزی ئەو پەنابەر و هاووڵاتییە عەرەبە سووریاییانە بگیرێت كە پەنایان بۆ هەرێمی كوردستان هێناوە و لێرە دەژین و پێویستە كۆتایی بەم هەڵمەتە نابەجێیە بهێندرێت و لایەنە پەیوەندیدارەكان ڕێگە لە دووبارەبوونەوەی ئەم جۆرە هەڵسوكەوتانە بگرن.

زانیاریی زیاتر: هەرێمی کوردستان میوانداریی سەدان هەزار پەنابەری سووریای کردووە کە زۆربەیان عەرەبن و لە شارە جیاوازەکاندا نیشتەجێن.