گەمارۆیەکی تووند خراوەتە سەر ئەشرەفییە و شێخ مەقسوود و ناهێڵن کوردەکان بگەڕێنەوە زیدی خۆیان

ئاڤا نیوز

 

هەردوو گەڕەكی ئەشرەفییە و شێخ مەقسوود هێشتا لە ژێر دەستی سوپای عەرەبی سووریادان و وەك ناوچەیەكی سەربازیی ناسێنراون، ڕێگە بە هیچ میدیایەكیش نادرێت بچنە ناو دوو گەڕەكەكە.

 

چیرۆكی سەرەكی: سووپای عەرەبی سووریا ڕێگە بە گەڕاندنەوەی 155 هەزار ئاوارە كوردەكان نادات لە عەفرین و دەوروبەری بۆئەوەی بگەڕێنەوە سەر ماڵ و حاڵی خۆیان، پاش ئەوەی شەڕ و ڕووبەڕووبوونەوەكان تەواو بوون، تەنها ئاوارە عەرەبەكان گەڕاونەتەوە بەتایبەت لە گەڕەكی ئەشرەفییە..

 

پاساوەكان: بیانووی سوپای عەرەبیی سووریا پاككردنەوەی گەڕەكەكانە لە چەك و تەقەمەنی، بەتایبەتی لە گەڕەكی شێخ مەقسوود كە بەرگری و شەڕە قورسەكە لەوێ كرا، كارەبا، خۆراك، ئاو، ئینتەرنێت، خزمەتگوزاری تەندروستی، هیچ شتێك بۆ گەڕەكەكان نەگەڕێنراوەتەوە.

 

زانیاری زیاتر: هەردوو گەڕەكەكە هاونیشتمانی كوردیان تێدا ماون و هەموو خەڵك نەیانتوانیوە ڕابكەن.

 

كاردانەوەكان: میدیاكانی نزیك لە هەسەدە باسی بێسەرشوێنبوونی سەدان كەس و كۆمەڵكوژی لە حەلەب دەكەن، بۆ نموونە ئاژانسی ئانها لەسەر زاری لیژنە خۆجێیەكانی هەسەدە دەڵێت: تا ئێستا 271 هاووڵاتی بێسەروشوێنن و كەس نازانێ چییان لێ هاتووە، بەشێكیان دەستگیركراون و بۆ شوێنێكی نادیار براون.

 

ڕاگەیێنراوی فەرمی: دوێنێ 11-1-2026، بەرپرسێكی حكومەتی سووریا ئاشكرایكرد، لە حەلەب 300 كوردیان دەستگیر كردووە.

 

مەترسییە گەورەكە: ئاژانسی ئانها دەڵێت: مەترسی تەسفیەكردن و كوشتنی بەكۆمەڵ لەسەر كوردی حەلەب هەیە و لەوبارەیەوە هەندێک گرتەی ڤیدیۆیی بڵاوکراونەتەوە کە بە تاوانی جەنگ دەناسێنرێن.

 

مانگی سووری كوردیش دەڵێت: ئەمڕۆ سێ ئەندامیان لە حەلەب ڕفێنراون و ناوەكانیشیان بڵاوكردوونەتەوە.

 

لێدوانی فەرمی: هەدیە یوسف، هاوسەرۆكی مانگی سووری كوردی دەڵێت: سێ ئەندامەكەیان لەكاتی ڕاپەڕاندنی ئەركە مرۆییەكانیان بۆ گواستنەوەی برینداران لە گەڕەكەكانی شێخ مەقسوود و ئەشرەفیە دەستگیركراون.

 

دەشڵێت: تیمەكەمان سەرقاڵی كارێكی مرۆیی بوون، دوور لە هەر ئەجێندایەكی سیاسی و سەربازی، دەستگیركردنیان پێشێلكارییەكی ئاشكرای یاسا مرۆییە نێودەوڵەتییەكانە، بەتایبەتی ڕێككەوتننامەكانی جنێڤ، كە گەرەنتی پاراستنی كارمەندانی پزیشكی و فریاگوزاری دەكات لەكاتی شەڕدا.