عەسائیب شەقامی بابل دەجوڵێنێت؛ پۆستی پارێزگار "هێڵی سوورە"

ئاڤا نیوز

هەزاران لایەنگری بزووتنەوەی سادیقوون (باڵی سیاسیی عەسائیبی ئەهلی حەق) لە پارێزگای بابل ڕژانە سەر شەقامەکان؛ ئەوان دەیانەوێت ڕێگری لە گۆڕینی پارێزگار بکەن و مانەوەی پۆستەکە لە دەستی خۆیان وەک "شایستەیەکی نیشتمانی" دەبینن.

چیرۆکی سەرەکی: 29ی مانگی ڕابردوو عەدنان فەیحان، پارێزگاری بابل وەک ئەندامی پەرلەمان عێراق سوێندی یاسایی خوارد و دواتریش لەسەر پشکی سادیقوون بوو بە جێگری یەکەمی سەرۆکی پەرلەمانی عێراق، لەو کاتەشەوە دەنگۆیەک لە بابل بڵاوکراوەتەوە و داوا دەکرێت ئەم پۆستە بدرێتە کەسێکی بێلایەن و لە عەسایب وەربگیرێتەوە.

زانیاریی زیاتر: دژی ئەم هەواڵە، ئەمڕۆ هەزاران ئەندامی بزووتنەوەی سادیقوون لەبەردەم بینای پارێزگای بابل خۆپیشاندانیان ئەنجامدا و ڕایانگەیاند، حیزبەکەیان دەستکەوتی گەورەی خزمەتگوزاری بۆ بابل هەبووە و داوا دەکەن کاروانی ئاوەدانی بە سەرۆکایەتی پارێزگارێکی سەر بە سادیقوون بەردەوام بێت.

لێدوانی فەرمی: عەلی تورکی، سەرکردەی بزووتنەوەی سادیقوون و کاندیدی ئەو حیزبە بۆ پۆستی پارێزگاری بابلیش ڕایگەیاند، هەوڵ دەدرێت ئەم شایستە دەستوورییە لە بزووتنەوەی سادیقوون وەربگیرێتەوە، بۆیەش خۆپیشاندانەکەی ئەمڕۆ باشترین وەڵامە کە حیزبەکەیان لە بابل چ قورساییەکی گەورەی هەیە.

ئەوەی پێویستە بیزانیت: پارێزگای بابل لە ماوەی ساڵی ڕابردوودا یەکێک بووە لەو پارێزگایانەی زۆرترین بودجەی ئاوەدانکردنەوەی بۆ تەرخان کراوە، ئەمەش وای کردووە پۆستی پارێزگارەکەی ببێتە "خەڵاتێکی سیاسیی" یەکجار گەورە بۆ هەر لایەنێک کە دەستی بەسەردا بگرێت.