ئیسرائیل نەخۆشخانەکانی بۆ باری لەناکاو ئامادە دەکات

ئاڤا نیوز

بەهۆی پەرەسەندنی گرژییەکان لەگەڵ ئێران، وەزارەتی تەندروستیی ئیسرائیل باری نائاسایی لە تەواوی نەخۆشخانە و ناوەندە پزیشکییەکان ڕاگەیاند؛ ئامانجی سەرەکی گۆڕینی خێرای سیستەمی "ئاسایی"یە بۆ سیستەمی "جەنگ".

وێنە گەورەکە: ئیسرائیل لەبەردەم ئەگەری ڕووبەڕووبوونەوەیەکی سەربازیی ڕاستەوخۆدایە لەگەڵ تاران. ئەم هەنگاوە نیشانەی ئەوەیە کە تەلئەبیب وانەی لە جەنگەکانی ڕابردوو وەرگرتووە و دەیەوێت پێش هەڵگیرسانی یەکەم چەخماخەی جەنگ، ژێرخانی تەندروستیی وڵاتەکە بە تەواوی ئامادە بێت بۆ وەرگرتنی قوربانییانی پێکدادانەکان.

بۆچی گرنگە: بەرزکردنەوەی ئاستی مەترسی بۆ "ئاستی چوارەم" یان "ئاگادارکردنەوەی سوور"، بە واتای ئەوە دێت کە سیستەمی تەندروستیی مەدەنی بە کردەیی دەبێتە پشتیوانێکی سەربازی. چۆڵکردنی 50%ی جێگەی نەخۆشخانەکان و ڕاگرتنی نەشتەرگەرییەکان، ئاماژەیە بۆ چاوەڕوانکردنی شەڕێکی چڕ و پڕ لە قوربانی.

ڕاگەیێنراوی فەرمی: وەزارەتی تەندروستی ئیسرائیل ڕایگەیاند، تائێستا ئاستی ئاگادارکردنەوە وەک خۆی ماوەتەوە و نەگۆڕاوە بەڵام ئەم هەنگاوە بۆ ئەوەیە کە سیستەمی تەندروستی بتوانێت بە خێراییەکی زۆر کارکردنیان لە دۆخی ئاساییەوە بگۆڕێت بۆ دۆخی نائاسایی.

ئەوەی لەبارەیەوە دەگوترێت: میدیاکانی ئیسرائیل بڵاویانکردووەتەوە، لە بەڵگەنامەیەکی وەزارەتی تەندروستی ئیسرائیل بۆ نەخۆشخانەکانی ئەو وڵاتەدا هاتووە، وانەکانی جەنگ و ئۆپەراسیۆنەکانی ڕابردوو جەخت لەسەر پێویستی ئەوە دەکەنەوە دۆخی ئاسایی بەخێرایی بگۆڕدرێت بۆ دۆخی نائاسایی.

٠ مانگی سووری ئیسرائیلی داوای کردووە هاووڵاتیان بەپەلە 12 هەزار یەکەی خوێن بیبەخشن، تاوەکو وەک یەدەگی ستراتیژی بۆ هەر ئەگەرێکی نەخوازراو لە بانکەکانی خوێندا ئامادە بێت.

ئەوەی پێویستە بیزانیت: میدیاکانی ئیسرائیل جەخت دەکەنەوە کە ئەم بڕیارە دوای لێکۆڵینەوە لە "وانەکانی جەنگی ڕابردوو" دراوە، کە تێیدا سستی لە گۆڕینی دۆخی نەخۆشخانەکان بۆ باری نائاسایی، ببووە هۆی دروستبوونی جەنجاڵی و پەککەوتنی چارەسەری بریندارەکان.