لایەنە سوننەکان گڵۆپی سەوز بۆ گەڕانەوەی مالیکی دادەگیرسێنن

ئاڤا نیوز

دوای ئەوەی چوارچێوەی هەماهەنگی بە کۆی دەنگ "نووری مالیکی" وەک کاندیدی سەرۆکوەزیران هەڵبژارد، لایەنە کوردی و سوننەکان گڵۆپەکەیان بۆ گەڕانەوەی سەوز کرد؛ مالیکیش یەکەم پەیامی ئەرێنیی ئاراستەی "موقتەدا سەدر" کرد.

چیرۆکی سەرەکی: ڕاوێژکاری سەرۆکی هاوپەیمانی دەوڵەتی یاسا ڕایگەیاند، دوای ئەوەی نووری مالیکی سەرۆکی هاوپەیمانێتییەکەیان بۆ پێکهێنانی حکومەت لەلایەن چوارچێوەی هەماهەنگییەوە هەڵبژێردرا، پارتی و یەکێتی و لایەنە سونییەکان پەیوەندییان پێوەکردوون و پیرۆزباییان لێکردوون، جەختیش دەکاتەوە لەوەی حکومەتەکەی مالیکی چاکردنی دۆخی ئابووری و پێشکەشکردنی خزمەتگوزاریی بە هاووڵاتیان، ئامانجی سەرەکیی دەبێت.

لێدوانی فەرمی: عەباس موسەی، ڕاوێژکاری سەرۆکی هاوپەیمانی دەوڵەتی یاسا ئەمشەو لە چاوپێککەوتنێکدا باسی لەوەشكرد، حەمید غەزی ئەمینداری گشتی ئەنجوومەنی وەزیرانی عێراق کە سەر بە ڕەوتی سەدرە لە حکومەتی داهاتووشدا لە پۆستەکەیدا دەمێنێتەوە. ئەوەش بە یەکەم پەیامی ئەرێنی کوتلەی مالیکی بۆ موقتەدا سەدر ڕێبەری ڕەوتی نیشتیمانی شیعی دادەنرێت کە ئەم ڕۆژانە هەموو چاوەکان لەسەر ئەوەن سەدر هەڵوێستی لەسەر گەڕانەوەی مالیکی بۆ سەرۆکایەتی حکومەت بۆ سێیەم خول چی دەبێت.

٠ موسەوی وتیشی،  نایانەوێت هیچ لایەنێک "ئیستفزاز" بکەن جا ئەو لایەنە بەشداری حکومەت بێت یا نا، بەڵکو دەیانەوێت حکومەتی داهاتوو حکومەتێکی سەرکەوتوو بێت و خزمەتگوزاریی پێشکەش بە خەڵک بکات، هەروەها کار بۆ باشترکردنی دۆخی ئابووری وڵات بکات.

٠ لەبارەی هەڵوێستی کورد و سوننەش لەسەر کاندیدکردنی مالیکی بۆ پۆستی سەرۆکوەزیران لەلایەن سەرکردەکانی چوارچێوەی هەماهەنگییەوە، عەباس موسەی ئاشکرای کرد پارتی و یەکێتی لەگەڵ زۆرینەی سەرکردەی سوننەکان بۆ کاندیدکردنی مالیکی پیرۆزباییان لێکردوون.

زانیاریی زیاتر: ئەو ڕاوێژکارەی مالیکی ئەوەشی خستەڕوو، کاندیدکردنی مالیکی لەناو چوارچێوەی هەماهەنگی بە کۆی دەنگ بووە و "بە پێکەنین و سەڵاوات" لێدان کاندیدکردنەکە تێپەڕیووە، ئەویش بەبۆنەی ئەوەی چوارچێوەی هەماهەنگی ئەم قۆناغەی بنبەستی سیاسی و دیاریکردنی کاندیدی سەرۆکوەزیرانی بە سەرکەوتوویی تێپەڕاندووە.