چەند وڵاتێکی ئەوروپی بۆ هاووڵاتیانیان: ئێستا ئێران جێبهێڵن؛ دواتر درەنگە

ئاڤا نیوز

لە دوای توندبوونەوەی هەڕەشە سەربازییەکانی نێوان تاران و واشنتن و بەردەوامیی خۆپیشاندانەکان، سێ وڵاتی ڕۆژئاوایی داوایان لە هاووڵاتیانیان کرد بەپەلە و بێ دواکەوتن خاکی ئێران جێبهێڵن.

وێنە گەورەکە: ئەم بڕیارانە هاوکاتن لەگەڵ لێدوانەکانی کۆشکی سپی بۆ تاوتوێکردنی "هێرشی ئاسمانی" و هۆشدارییەکانی ئیسرائیل. چۆڵکردنی کارمەندانی باڵیۆزخانەکان و هاووڵاتیان، زۆرجار وەک دوایین هەنگاوی دیپلۆماسی دەبینرێت پێش ئەوەی چەکەکان بکەونە کار.

چیرۆکی سەرەکی: وردەکاریی داواکاریی وڵاتەکان بەم شێوەیەیە:

سوید: وەزارەتی دەرەوە داوای لە هاووڵاتیانی کردووە "بەبێ هیچ دواکەوتنێک و بە زۆرترین خێرایی" لە ئێران بچنە دەرەوە.

ئوسترالیا: هۆشداریی داوە کە ئێستا ڕێکارەکانی جێهێشتن ئاسانن، بەڵام زۆر بە خێرایی سنووردار دەبن؛ هەروەها داوای کردووە هیچ هاووڵاتییەکیان بۆ هەر کارێک بێت گەشت بۆ ئێران نەکات.

فەرەنسا: دەستی بە کەمکردنەوەی ژمارەی کارمەندانی کردووە و فەرمانی بە کارمەندە "ناپێویستەکانی" باڵیۆزخانەکەی لە تاران کردووە وڵاتەکە جێبهێڵن.

ئیسپانیا: بانگهێشتی باڵیۆزی ئێران لە مەدرید دەکات سەبارەت بە گرژیی و ئاڵۆزییەکان داوای ڕوونکردەوە دەکات.

زانیاریی زیاتر: پێشتر ئەمریکاش داوای لە هاووڵاتیانی کردبوو لە ڕێگەی وشکانییەوە بەرەو تورکیا و ئەرمینیا هەڵبێن. تاران لە بەرامبەردا هەڕەشەی لێدانی کەشتیگەلە ئەمریکییەکانی کردووە، ئەمەش وای کردووە کۆمەڵگەی نێودەوڵەتی وای ببێنێت کە دەرفەتەکانی دیپلۆماسی بۆ هێورکردنەوەی دۆخەکە خەریکە دەبنە سفر.