سوپای عەرەبیی سووریا ناوچەکانی مەسکەنە و دێر حافر دەکاتە ناوچەی سەربازی

ئاڤا نیوز

دەستەی ئۆپەراسیۆنە سەربازییەکانی سوپای عەرەبی سووریا، هەردوو ناوچەی مەسکەنە و دێر حافری لە ڕۆژهەڵاتی حەلەب وەک "ناوچەی سەربازیی داخراو" ڕاگەیاند؛ ئەمەش وەک ئامادەکارییەک بۆ دوورخستنەوەی تەواوەتیی هێزە کوردییەکان لەو ناوچانە.

بۆچی گرنگە: مەسکەنە و دێر حافر خاڵی ستراتیژین و وەک پردی پەیوەندی لە نێوان حەلەب و ڕەققە دەبینرێن. چۆڵکردنی ئەم ناوچانە لە لایەن هەسەدەوە، واتا کشانەوەی هێزە کوردییەکان بۆ دواوەی هێڵە بەرگرییەکانیان لە ڕۆژهەڵاتی فوورات و نەمانی دەسەڵاتیان بەسەر ئەو ناوچە عەرەبنیشینانەی کە لە ژێر کۆنتڕۆڵیاندا مابوونەوە.

ڕاگەیێنراوی فەرمی: دەستەی ئۆپەراسیۆنە سەربازییەکانی سوپای عەرەبی سووریا ڕایگەیاند: "بە هەموو شێوەیەک ڕێگری لە گرووپە چەکدارەکان دەکەین ئەم ناوچانە وەک پێگەیەک بۆ ئەنجامدانی کردەوەکانیان بەکاربهێنن؛ پاراستنی سەروەریی خاک و گیانی هاووڵاتیان لە پێشینەی کارەکانمانە."

٠ دەستەی ئۆپەراسیۆنە سەربازییەکان بڕیاریشی داوە هەردوو ناوچەی مەسکەنە و دێر حافر لە لادێکانی ڕۆژهەڵاتی حەلەب وەک ناوچەی سەربازیی داخراو مامەڵەی لەگەڵ بکرێت.

٠ هاوکات داوای لە هاووڵاتییان کرد، بۆ پاراستنی گیانیان لە بنکە و بارەگاکانی هێزەکانی سووریای دیموکرات (هەسەدە) لەو ناوچانە دوور بکەونەوە، سوپا جەختیشی کردەوە کە بە هەموو شێوەیەک ڕێگری لە گرووپە چەکدارەکان دەکات کە ئەو ناوچانە وەک پێگەیەک بۆ ئەنجامدانی کردەوەکانیان بەکاربهێنن.