د.مورشید خەزنەوی: ئەوەی لە حەلەب ڕوودەدات کوشتنی موسڵمانانە بە ناوی ئاینەوە

 

 

د.مورشید خەزنەوی، کەسایەتیی دیاری ئایینی میوانی ئاڤا بوو، لە گەشتی هەواڵی سورەیا هەساری بە ئاڤای وت، گرووپە چەکدارەکان بەناوی جیهادەوە کورد دەکوژن، دوژمنانی کورد سەد ساڵە هەموو ڕێگایەکیان تاقیکردووەتەوە بۆ لەناو بردنی کورد ئێستاش لە ڕێگای دینەوە دژی کورد دەوستنەوە.

 

لێدوانی فەرمی: د.مورشید خەزنەوی، بە ئاڤای وت: "ئەوەی لە حەلەب ڕوودەدات کۆتایی شەڕ نییە پێویستە کورد بەئاگا بێت و پشتیوانی یەکتر بکەن، دوژمن لە دەرفەتی پەرتەوازەبوونی کورد دەگەڕێت، پێویستە لە ڕووی سیاسیی و سەربازییەوە زۆر یەکگرتووبین هەر بۆ ئەو مەبەستەش 'سەرۆک بارزانی' چەندینجار دڵنیایی داوە کە دەبێت هەمووان یەکگرتووبن."

 

خەزنەوی، وتیشی: "ئاینی ئیسلام ڕێگا نادات سووکایەتی بە تەرمی مرۆڤ بکرێت، ئەوەی ئەوان بەرامبەر شەڕڤانان کردیان، شەهیدانی ئێمە بەرزتر و گەورەتر دەکات، مۆڕاڵی ئێمە بەرز دەکاتەوە و شەڕی میدیای ئەوان سەرناکەوێت، بەو شێوە ناشرینە وێنای خۆیان دەکەن."

 

٠ لە سووریای نوێدا هۆشیاری ئاینی نییە، خەڵک ماڵی لە دەستی ئەوان پارێزراو نییە و دەبێت بەرامبەرییان بوەستینەوە.

 

٠ ئەوانە داعشن بە ناو و مۆدێلێکی دیکە بیرێکی توندڕەوییان هەیە بۆ ناشیرین کردنی ئاینی ئیسلام، دەیانەوێت لە ژێر ئەو ناوە تۆڵە لە شەڕڤانان بکەنەوە.

 

لەلایەکی دیکە: سەبارەت بەوەی مامۆستایەکی ئایینی لە میدیاکان دەڵێت، "ئافرەت نابێت شەرڤان بێت و دەبێت لەماڵەوە کاربکات". خەزنەوی دەڵێت: "ئێمە سەربڵندین بە ئافرەتی کورد، ئەوان لە بوارە جیاوازەکان کاردەکەن و شەڕڤانن، هەمیشە ئافرەتی کورد سەلماندوویەتی لە پیاوان نیشتمان پەروەرترن، وەک لە کرمانجیدا دەگوترێت "شێر شێرە چ ژنە چ مێرە"، لەبەر ئەوە ئەو مامۆستا ئایینییە بە واقعی ئیسلام نابینێت، ئافرەت لە ئیسلامدا بەشداری شەڕییان کردووە و نموونەشمان زۆرە.