هاوسەرۆکی گشتیی دەم پارتی بۆ باخچەلی: پێویستە بەرگری لە مافەکانی کورد بکەیت، نەک هێرش بکەیتە سەریان

ئاڤا نیوز

 

هاوسەرۆکی گشتیی دەم پارتی، بە توندی وەڵامی دەوڵەت باخچەلی، سەرۆکی گشتیی مەهەپە دەداتەوە و دەڵێت: پێویستە سەیری وەحشیگەرییەکەی حەلەب بکەین. ئەوەی پابەند نەبووە بە ڕێککەوتنی 10ی ئادارەوە، هەسەدە نییە، بەڵکو ڕژێمە. مادام باسی برایەتی کورد و تورک دەکەیت، ئەرکی شانی باخچەلییە بەرگری بکات لە مافی کوردەکانی سووریا.

 

چیرۆکی سەرەکی: تونجەر باکرهان لە میانی کۆبوونەوەی فراکسیۆنی پارتەکەی لە پەرلەمانی تورکیا لەبارەی هێرشی گرووپە چەکدارەکانی سەر بە سوپای عەرەبیی سووریا بۆ سەر گەڕەکە کوردییەکانی حەلەب دەڵێت: لەوێ پرۆڤە کرا بۆ کۆمەڵکوژییەکی بێدەنگ. 

 

لێدوانی فەرمی: تونجەر باکرهان بانگەشەی ئەوە دەکات کە ڕژێمی دیمەشق و ئەو گرووپە چەکدارییانەی تورکیا پاڵپشتییان دەکات بۆ تەواوکردنی ئامانجەکەی داعش هێرشیان کردە سەر کوردەکانی حەلەب و دەڵێت: ئەوان بەوانە دەڵێن تیرۆریست کە 100 ساڵە لە شێخ مەقسوود و ئەشرەفییە دەژین. ئەمە شێواندنی ڕاستییەکانە. ئەگەر بە دوای تیرۆریستدا دەگەڕێن، با سەیری ئەو داعش و ڕەفتار داعشانە بکەن خەڵک لەوێ دەکوژن.

 

- لە حەلەب ئەزموونی (کیمیابارانکردنی) هەڵەبجە دووبارە کرایەوە و دەڵێت: بە کۆمەڵ کوشتنی کورد ناتوانن، ڕژێمە داتەپیووەکانتان لەسەر پێ ڕابگرن.

 

لەلایەکی دیکە: باکرهان بە توندی ڕەخنەی لە وەزارەتی بەرگریی تورکیا گرت کە ڕاگەیاندبوو ئەگەر سووریا داوایان لێ بکات هێز ڕەوانەی حەلەب دەکەن، دەڵێت: لە کاتێکدا جیهان داوای ئارامی دەکات، وەزارەتی بەرگریی تورکیا بە ڕژێم دەڵێت 'ئەگەر بانگهێشتمان بکەیت، ئێمە ئامادەین بێین بۆ حەلەب، کورد دەر بکەین'.

 

- باکرهان وەڵامی باخچەلی دایەوە لەبارەی پابەندبوون بە ڕێککەوتنی 10ی ئادارەوە و دەڵێت: ڕژێمی دیمەشق پابەند نەبووە بە ڕێککەوتنەکە نەک هەسەدە. هەسەدە بەپێی ڕێککەوتنی 10ی نیسان چەکە قورسەکانی لە حەلەب کشاندەوە.