عێراق و ئێران داوای بەردەوامی کاری پێکەوەیی و ئارامی ناوچەکە دەکەن

ئاڤا نیوز

 

وەزیری دەرەوەی عێراق لەگەڵ یاریدەدەری وەزیری دەرەوەی ئێران کۆبووەوە و ڕایگەیاند، بە گرنگی دەزانێت بوارەکانی کاری هاوبەش و پێکەوەیی فراوان بکرێن، بەجۆرێک پەیوەندییەکانی بەغدا و تاران لە خزمەتی هەردوو گەل و ئارامی ناوچەکەدا بن.

 

چیرۆکی سەرەکی: وەزارەتی دەرەوەی عێراق بڵاویکردەوە، ئەمڕۆ سێشەممە، فوئاد حوسێن، جێگری سەرۆکوەزیران و وەزیری دەرەوەی عێراق، لە بەغدا پێشوازی لە وەحید جەلال زادە، یاریدەدەری وەزیری دەرەوەی ئێران بۆ کاروباری کونسوڵخانەکان و پەرلەمان کردووە، لە کۆبوونەوەکەشدا پەیوەندییەکانی نێوان هەردوو وڵات و گرنگی گەشەپێدانیان لە بوارە هاوبەشەکان باس کراوە، ئەویش بەجۆرێک لە خزمەتی بەرژەوەندیی هەردوولا و بەهێزکردنی ئارامی ناوچەکەدا بێت.

 

هەنگاوی داهاتوو: لە کۆبوونەوەکەدا جەخت لە گرنگی کاراکردنی لیژنەی عێراق و ئێران بۆ کاروباری کونسوڵخانەکان کراوەتەوە، بەتایبەتیش کۆبوونەوەی داهاتوو کە بڕیارە لە بەغدا بکرێت، وەزارەتی دەرەوەی عێراق دەڵێت، ئەم کۆبوونەوەیە هاوکار دەبێت بۆ چارەسەری پرسی کونسوڵخانەکان و کارئاسانی زیاتریش بۆ کاروباری هاووڵاتیان لە هەردوو وڵاتدا دەکات.

 

زانیاری زیاتر: لەبارەی خۆپیشاندانەکانی ئێرانیش، وەزارەتی دەرەوەی عێراق باسی لەوەکردووە، یاریدەدەری وەزیری دەرەوەی ئێران، بەرچاوڕوونی دایە وەزیری دەرەوەی عێراق لە دوایین پێشهاتەکانی ئێران و لەناویاندا خۆپیشاندانەکانی چەند شارێکی ئەو وڵاتە، جەختیشی لە گرنگی کاری هاوبەش بۆ پشتیوانی ئارامی هەرێمیی کردووەتەوە.