فڕۆکەخانەکانی هەولێر و بەغدا ڕەتی دەکەنەوە گەشتە ئاسمانییەکانی نێوان عێراق و ئێران ڕاگیرابن

ئاڤا نیوز

 

وەزارەتی گواستنەوەی عێراق دەنگۆی ڕاگرتنی گەشتە ئاسمانییەکانی نێوان عێراق و ئێران ڕەت دەکاتەوە. بەڕێوەبەری فڕۆکەخانەی نێودەوڵەتیی هەولێریش دەڵێت: بە فەرمی پێماننەوتراوە کە گەشتەکان ڕابگیرێت.

 

وێنە گەورەکە: پێشتر لە میدیاکان وا بڵاو کرایەوە بەهۆی دۆخی ئێستای ئێران و بەردەوامی ناڕەزایەتی و خۆپیشاندانەکانی ئەو وڵاتە، گەشتە ئاسمانییەکانی نێوان ئێران و فڕۆکەخانەی نێوەدەوڵەتیی بەغدا ڕاگیران.

 

لێدوانی فەرمی: مەیسەم سافی، وتەبێژی وەزارەتی گواستنەوەی عێراق بە ئاڤا میدیای ڕاگەیاند، دەنگۆی ڕاگیرانی گەشتە ئاسمانییەکان لە عێراقەوە بۆ کۆماری ئیسلامیی ئێران و بەپێچەوانەشەوە، ناڕاستە.

 

لەلایەکی دیکە: ئەحمەد وشیار، بەڕێوەبەری فڕۆکەخانەی نێودەوڵەتیی هەولێر بۆ ئاڤا: ئەمڕۆ گەشتێک هەبووە لە ئێرانەوە بۆ هەولێر و دواتر فڕۆکەکە گەڕاوەتەوە ئێران، تاوەکو ڕۆژی هەینی هیچ گەشتێکی دیکە نییە، بە فەرمیش پێماننەوتراوە کە گەشتەکان ڕابگیرێت.

 

- سەرجەم گەشتە ئاسمانییەکان لەنێوان عێراق و کۆماری ئیسلامی ئێران ئاسایین و گەشتەکانی هێڵی ئاسمانی عێراق و هێڵەکانی دیکەش بۆ ئێران ڕانەگیراون و بەشێوەی ئاسایی بەردەوامن.