کۆشکی سپی تاوتوێی بژاردەکانی وەڵامدانەوەی خۆپێشاندانەکانی ئێران دەکات

ئاڤا نیوز

تیمی ئاسایشی نیشتمانیی کۆشکی سپی، سەرلەبەیانیی ڕۆژی سێشەممە کۆبوونەوەیەکی تایبەتیان سەبارەت بە بژاردەکانی وەڵامدانەوەی توندوتیژییەکانی ئێران بەرامبەر خۆپێشاندانە بەردەوامەکانی ئێران ئەنجامدا. میدیای ئەمریکا دەڵێت: دۆناڵد ترەمپ، سەرۆکی ئەمریکا لەو کۆبوونەوەیەدا ئامادە نەبووە.

 

لێدوانی فەرمی: بەرپرسێکی باڵای ئەمریکا بە پێگەی ئەکسیۆسی ڕاگەیاندووە، گفتوگۆکانی ناو ئیدارەی ترەمپ لە قۆناغێکی سەرەتاییدان و لە ئێستادا لە دۆخی بڕیاردان نین بۆ هیچ هێرشێک بەڵام جەختیشی کردەوە کە پێشبینیکردنی بڕیاری کۆتایی ترەمپ کارێکی قورسە.

 

لە لایەکی دیکەوە: سەرچاوەیەکی ئاگادار بە ئەکسیۆسی وتووە، مارکۆ ڕوبیۆ، وەزیری دەرەوەی ئەمریکا، لە کۆبوونەوەیەکی داخراودا ئاماژەی بەوە کردووە لەم قۆناغەدا ئیدارەی ئەمریکا وەڵامی سەربازی نابێت بەڵام بەجۆرێکی دیکە یارمەتی خۆپێشاندەرانی ئێران دەدات کە دەستوەردانی ڕاستەوخۆ نەبێت.

 

باکگراوند: خۆپێشاندانەکان لە شارە جیاجیاکانی ئێران بەردەوامن و ئامارەکانی کوژراوان بە شێوەیەکی بەرچاو بەرزبوونەتەوە. بەپێی هەڵسەنگاندنێکی هەواڵگریی ئیسرائیل کە بۆ ئەمریکا نێردراوە، باس لەوە دەکرێت لانیکەم پێنج هەزار خۆپێشاندەر کوژراون.