ئەندامێکی هێزەکانی ئاسایش لە حەلەب: هێرشکارەکان زمانی عەرەبییان نەدەزانی

ئاڤا نیوز

 

ئەندامێکی هێزەکانی ئاسایشی ڕۆژئاوای کوردستان لە گەڕەکە کوردییەکانی حەلەب دەڵێت، ئەوانەی لە هێرشکردنەسەر هەردوو گەڕەکی شێخ مەقسوود و ئەشرەفیە بەشداربوون، چەکداری بیانیی بوون و زمانی عەرەبییان نەدەزانی، ئاشکراشی دەکات قەبارەی پێشێلکاریی گرووپەکانی سەر بە دیمەشق زۆر لەوە گەورەترە کە باس دەکرێت.

لێدوانی فەرمی: بروسک عەلی، یەکێک لە ئەندامانی هێزەکانی ئاسایش لە هەردوو گەڕەکی شێخ مەقسوود و ئەشرەفیەی حەلەب بە میدیای ڕۆژئاوای کوردستانی ڕاگەیاند، هەموو ئەوانەی لە هێرشی سەر گەڕەکە کوردییەکان بەشداربوون گرووپەکانی نزیک لە تورکیا بوون لەناو سوپای عەرەبی سووریا، قەبارەی ئەو تاوان و کوشتن و پێشێلکارییانەشی کردیان بە هیچ شێوەیەک پێناسە ناکرێت و هیچ پاساوێکیش بۆ ئەو تاوانانە نەبوو.

لەبارەی ناسنامەی هێرشکارەکانیش، بروسک، دەڵێت: "ئەوانەی هێرشیان دەکرد تەنیا بەناو سەر بە سوپای عەرەبی سووریا بوون، بەڵام لە بنەڕەتدا هەموویان چەکداریی بیانی بوون و زمانی عەرەبییان نەدەزانیی، وەک ئەوە وابوو لەگەڵ چەکدارانی داعش لەشەڕدا دەبین."

باکگراوند: چوار ڕۆژ بەسەر ڕێککەوتنی ئاگربەست و گواستنەوەی هێزەکانی ئاسایش لە گەڕەکە کوردییەکانی حەلەب بۆ ڕۆژهەڵاتی فوڕات تێدەپەڕێت، بەگوێرەی ڕێککەوتنەکە ئەندامانی هێزەکانی ئاسایش گەڕەکە کوردییەکانی حەلەبیان جێهێشت و بەرەو باکوور و ڕۆژهەڵاتی سووریا گوازرانەوە.