عێراق و ئێران بۆ کۆنتڕۆڵکردنی سنوورەکان و ڕێگری لە تیرۆر هەماهەنگی دەکەن

ئاڤا نیوز

ڕاوێژکاری ئاسایشی نیشتمانیی عێراق ڕایدەگەیێنێت، لەگەڵ سکرتێری ئەنجوومەنی باڵای ئاسایشی نیشتمانیی ئێران، لەسەر بەهێزکردنی هەماهەنگییە ئەمنییەکان و کۆنتڕۆڵکردنی وردی سنوورە هاوبەشەکان ڕێککەوتوون.

 

ئەوەی پێویستە بیزانیت: قاسم ئەعرەجی، ڕاوێژکاری ئاسایشی نیشتمانیی عێراق لە پەیوەندییەکی تەلەفۆنی لەگەڵ عەلی لاریجانی، سکرتێری ئەنجوومەنی باڵای ئاسایشی نیشتمانیی ئێران جەختیان لە پێویستیی هاوکاریی هاوبەش کردەوە تاوەکوو ڕێگری لە هەر هەوڵێکی دزەکردنی گرووپە "تیرۆریستییەکان" لە نێوان هەردوو وڵاتدا بگیریێت.

 

بۆچی گرنگە: ئەو پەیوەندییە تەلەفۆنییە لەکاتێکدا دێت ماوەی چەند ڕۆژێکە خۆپێشاندان و ناڕەزایەتییەکانی ناوخۆی ئێران سەریان کێشاوە بۆ پشێوی. لەسەر خۆپیشاندانەکانیش دۆناڵد ترەمپ، داوای لە خۆپیشاندەران کردووە بەردەوام بن، چونکە بە گوتەی ئەو "هاوکاری لە ڕێگایە".

 

بڵاوکراوەی فەرمی: ئەعرەجی لە هەژماری فەرمیی خۆی لە تۆڕی کۆمەڵایەتیی "ئێکس" بڵاوی کردەوە، لە گفتوگۆکەدا پێداچوونەوەی وردیان بۆ دوایین پێشهاتە ئەمنییەکان کردووە و باسیان لە میکانیزمەکانی بەهێزکردنی پەیوەندییەکان کردووە بۆ ڕێگریکردن لە دزەکردنی گرووپە تیرۆریستییەکان بۆ ناو خاکی یەکدی.

 

ئەمەش بزانە؛ عێراق و ئێران خاوەنی زیاتر لە 1400 کیلۆمەتر سنووری هاوبەشن، کە کۆنتڕۆڵکردنیان هەمیشە وەک پێشینەیەکی گرنگی ئەمنی بۆ هەردوو دەوڵەت ماوەتەوە.