ئەمریکا بنکەی "عەین ئەسەد" چۆڵ دەکات

ئاڤا نیوز

سەرچاوەیەکی ئەمنی بۆ ئاڤا ئاشکرای کرد، هێزەکانی ئەمریکا دەستیان بە چۆڵکردنی بنکەی سەربازیی "عەین ئەسەد" کردووە لە پارێزگای ئەنبار.

لێدوانی فەرمی: ئەو سەرچاوەیە بە ئاڤا میدیای ڕاگەیاند: "لەم هەفتەیەدا هێزەکانی ئەمریکا زۆرینەی کەلوپەل و ئامێرەکانیان گواستووەتەوە و دەستیان کردووە بە هەڵوەشاندنەوەی بنکە، هۆڵ، ئامێرەکانیان و سیستەمی چاودێری و بردوویانە بۆ بنکەی تەنەف لە سووریا".

سەرچاوەکە ئاماژەی بەوەشکرد، "زۆربەی ڕاوێژکار و ئەفسەرە باڵاکان بە دوو ئاڕاستە کشاونەتەوە، یەکەم، بەرەو بنکەی تەنەف لە سووریا، دووەم بەرەو بنکەی هەریر لە هەولێر، بەگشتی ژمارەیەک سەرباز و بەشێک لە هێزی ئاسمانی ئەمریکا لە عەین ئەسەد ماون، پرۆسەی گواستنەوەیان لە چەند ڕۆژی داهاتوودا بەردەوام دەبێت".

لەلایەکی دیکەوە: عەبدوڵڵا جغێفی، ڕاوێژکاری لیژنەی ئاسایش و بەرگریی ئەنجوومەنی پارێزگای ئەنبار بە ئاڤا میدیای وت: "بنکەی سەربازیی عەین ئەسەد زۆر گەورەیە، فەرماندەیی هێزەکانی وشکانی و ئاسمانی و فەرماندەیی ئۆپەراسیۆنەکانی جەزیرەی لە بادیە  تێدایە و دوای کشانەوەی هێزەکانی ئەمریکا هیچ گۆڕانکارییەک لە بنکەکە ڕوو نادات، چونکە هێزێکی کەم ماون."

زانیاری زیاتر: فەرماندەیی ئۆپەراسیۆنەکانی جەزیرە و بادیە کە ڕاستەوخۆ بە فەرماندەیی ئۆپەراسیۆنە هاوبەشەکان گرێدراون مەلەفی ئەمنی بنکەی عەین ئەسەد وەردەگرێت.