ئەمریکا پێدانی ڤیزا بە هاووڵاتیانی 75 وڵات ڕادەگرێت؛ عێراقیشی تێدایە

ئاڤا نیوز

وەزارەتی دەرەوەی ئەمریکا بڕیارێکی نوێی دەرکرد بۆ ڕاگرتنی کاتیی ڕێکارەکانی پێدانی ڤیزا بۆ هاووڵاتیانی 75 وڵات و عێراقیش یەکێکە لەو وڵاتانە.

زانیاریی بەدەستهاتوو: کەناڵی فۆکس نیوزی ئەمریکی بڵاویکردووەتەوە، بەپێی یاداشتێک کە وەزارەتی دەرەوەی ئەمریکا فەرمان بە کونسوڵخانەکان کراوە پێدانی پرۆسەی ڤیزا تا کاتێکی نادیار ڕابگرن.

ئەو وڵاتانەی پێدانی ڤیزا پێیان ڕاگیراوە، 75 وڵاتن و پێکهاتوون لە عێراق، ئێران، ئەفغانستان، سۆماڵ، ڕووسیا، بەرازیل، میسر، نەیجیریا، تایلاند، یەمەن و چەند وڵاتێکی دیکە.

زانیاریی زیاتر: ئەم بڕیارە لە ڕێکەوتی 21ـی ئەم مانگە دەچێتە بواری جێبەجێکردنەوە و دیار نییە کەی پڕۆسەی پێدانی ڤیزا بەو وڵاتانە کارا دەکرێتەوە.

لێدوانی فەرمی: تۆمی پیگۆت، جێگری وتەبێژی وەزارەتی دەرەوەی ئەمریکا دەڵێت، وەزارەتی دەرەوە دەسەڵاتە یاساییەکانی خۆی بەکاردەهێنێت بۆ ڕێگریکردن لەو کۆچبەرانەی دەبنە بارگرانی و دەیانەوێت سوود لە میهرەبانی گەلی ئەمریکا وەربگرن، بۆیە کۆچکردن لەو 75 وڵاتەوە ڕادەگیرێت تا ئەو کاتەی دڵنیا دەبینەوە لەوەی کەسانی بیانی بۆ وەرگرتنی مووچەی بێکاری و وەرگرتنی هاوکاری نایەنە ناو ئەمریکا.