ڕاگەیێنراوێکی خێرا لە هەسەدە؛ ناوچەكە بەرەو شەڕێكی گەورە دەڕوات

ئاڤا نیوز

هێزەکانی سووریای دیموکرات (هەسەدە) هۆشداریی لە بەرپابوونی شەڕێکی گەورە دەدات و ڕایدەگەیێنێت، لە بەرەبەیانی ئەمڕۆوە، ناوچەکانی دێر حافر، مەسکەنە و بەنداوی تشرین ڕووبەڕووی پەرەسەندنێکی سەربازیی مەترسیدار و هێرشی سیستەماتیک بوونەتەوە.

ڕاگەیێنراوی فەرمی: ناوەندی ڕاگەیاندنی هەسەدە لە ڕاگەیێنراوێکدا ئاشکرای کرد، ئەم پەرەسەندنە بە بەشداریی گرووپە چەکدارەکانی سەر بە سوپای عەرەبی سووریا و فڕۆکە بێفڕۆکەوانەکانی تورکیا ئەنجام دەدرێت و ئامانجی تێکدانی سەقامگیری و پەکخستنی ژیانی مەدەنییەکانە.

بەپێی ڕاگەیێنراوەکە، گرووپە چەکدارەکانی سەر بە سوپای عەرەبی سووریا زیاتر لە 12 هێرشیان بە درۆنی بۆمبڕێژکراو و تۆپهاوێژ کردووەتە سەر بەنداوی تشرین و گوندەکانی دەوروبەری، تاوەکو ئێستاش بۆردومانەکان بەردەوامن.

هاوکات، نانەواخانەی مەدەنی و باڵەخانەی پۆستەی شاری دێر حافر کراونەتە ئامانج، کە ئەمەش بووەتە هۆی پەککەوتنی خزمەتگوزارییەکان و دروستبوونی هەڕەشەی ڕاستەوخۆ بۆ سەر ئاسایشی خۆراکی دانیشتووان.

هەسەدە ئاماژەی بەوەش کرد، هێرشبەرەکان ڕێگرییان لە جووتیارانی ناوچەکە کردووە بگەنە سەر زەوییەکانیان.

زانیاریی زیاتر: هەسەدە دەڵێت: لە ڕووی مەیدانییەوە، شەڕڤانان هەوڵێکی دزەکردنی لایەنی هێرشبەریان لە میحوەری گوندی "زوبەیدە" تێکشکاندووە و ناچاریان کردوون ڕابکەن.

هاوکات، فڕۆکە بێفڕۆکەوانەکانی تورکیا لە جۆری "بایرەکدار" چوار جار شاری مەسکەنەیان بۆردوومان کردووە و خاڵێکی سەربازیشیان لە گوندی "ئەلبوعاسی" لە گوندەواری تەبقا پێکاوە.

هەسەدە جەخت دەکاتەوە کە دیمەشق بەرپرسیاری تەواوی ئەم ئاڵۆزییانە و پاشهاتە مرۆیی و ئەمنییەکانە و ئەم هێرشانە وەک هەوڵێکی مەبەستدار بۆ وێرانکردنی ژێرخان و پەکخستنی ژیانی مەدەنییەکان دەبینرێت.