بۆ هەموو شۆفێران؛ هاتووچۆی هەولێر 7 بڕیاری نوێی دەرکرد

ئاڤا نیوز

هاتووچۆی هەولێر سەرجەم شۆفێران ئاگادار دەکاتەوە بۆ ساڵی 2026 حەوت بڕیاری نوێیان دەرکردوون و لەمڕۆوە جێبەجێ دەکرێن، هەر شۆفێرێک سەرپێچی بکات سزا دەدرێت.

ڕاگەیێنراوی فەرمی: بەڕێوەبەرایەتیی هاتووچۆی هەولێر هۆشداری بە شۆفێران دەدات تیمەکانیان لە ترافیکلایتەکان و بازگە و مەفرەزەکان، هەروەها لەناو ئۆتۆمبێلەکانی هاتووچۆ  بەدواداچوون بۆ جێبەجێکردنی بڕیارەکان دەکەن.

بڕیارەکان ئەمانەن:

یەکەم: ئۆتۆمبێلی بێ تابلۆ یان تابلۆی ساختە لێپرسینەوەی یاسایی لەگەڵ دەکرێت و دەستی بەسەردا دەگیرێت.

دووەم: بەکارهێنانی مۆبایل لەکاتی شوفێری ڕووبەرووی سزای دارایی دەکرێتەوە.

سێیەم: بەکارنەهێنانی پشتێنی سەلامەتی، لە ناوشار و لە دەرەوەی شار ڕووبەرووی سزای دارایی دەکرێتەوە. بۆیە خۆتان ڕابهێنن لەگەڵ داگیرساندنی ئۆتۆمبێل پشتێنی سەلامەتی ببەستن.

چوارەم: جام ڕەشکردن بێ مۆڵەت، بەکارهێنانی نەشرە و فلاشەر و دەستکاریکردنی گزۆز، دەستی بەسەردا دەگیرێت و سزای دارایی دەدرێت.

پێنجەم: شوفێریکردن بێ مۆڵەت ڕووبەرووی دادگا و یاسا دەکرێتەوە.

شەشەم: ماتۆرسواری دیلیڤەری و هەر جۆرە ماتۆرێکی دیکە پێویستە هەردوو تابلۆی پێشەوە و دواوەی پێوە بێت و بەفەرمی تۆمار کرا بێت، بەپێچەوانەوە دەستی بەسەردا دەگیرێت.

حەوتەم: ماتۆرسوار دەبێ مۆڵەتی لێخوڕینی هەبێت و کڵاو و پێداویستی سەلامەتی لەسەر بێت، بەپێچەوانەوە سزای داریی دەکرێت.

ڕوونکردنەوەی زیاتر: شوفێر پێویستە ئاگادار بێت هەموو کاتێک لەژێر چاودێری تیمەکانی هاتووچۆیە. تیمەکان ئۆتۆمبێلی مەدەنی (تابلۆ شارستانی) لەپاڵ ئۆتۆمبێلی میری بەکاردەهێنن بۆ چاودێریکردنی شەقامەکان و پەیڕەوکردنی یاساکان.