سعوودیە بۆ ئێران: ڕێگە نادەین خاک و ئاسمانمان بۆ هێرشکردنە سەرتان بەکاربهێنرێت

ئاڤا نیوز

ڕیاز پەیامێکی ناڕاستەوخۆی بۆ تاران ناردووە و تێیدا جەخت دەکاتەوە نابێتە بەشێک لە هیچ هێرشێکی سەربازی ئەمریکا بۆ سەر ئەو وڵاتە.

وێنە گەورەکە: واشنتن هەڕەشەی وەشاندنی گورزی سەربازی لە ئێران دەکات وەک وەڵامێک بۆ سەرکوتکردنی توندی خۆپیشاندەران لە ناوخۆی ئەو وڵاتەدا. لە بەرامبەردا، تاران هۆشداری داوە کە ئەگەر هێرشی بکرێتە سەری، بەرژەوەندییە سەربازییەکانی ئەمریکا و کەشتیگەلەکانی لە ناوچەکەدا دەکاتە ئامانج.

زانیاریی بەدەستهاتوو: دوو سەرچاوەی نزیک لە حکومەتی سعوودی بە ئاژانسی فرانس پرێسیان، ڕاگەیاندووە، سعوودیە بە فەرمی ئێرانی ئاگادار کردووەتەوە ڕێگە نادات خاک یان کایەی ئاسمانیی وڵاتەکەی بۆ هێرشکردنە سەر تاران بەکاربهێنرێت.

سەرچاوەیەکی سەربازی سعوودی بە ئاژانسەکەی ڕاگەیاندووە، سعوودیە ڕاستەوخۆ بە تارانی ڕاگەیاندووە، نابێتە بەشێک لە هیچ کردەوەیەکی سەربازی دژی ئەو وڵاتە و خاک و ئاسمانی خۆی بۆ ئەو مەبەستە بەکارناهێنرێت.

ئەم پەیامە بە فەرمی بە دەسەڵاتدارانی تاران گەیشتووە، ئەمەش نیشانەی ئەوەیە کە ڕیاز دەیەوێت خۆی لە ململانێی سەربازیی ئەگەری لە نێوان واشنتن و تاراندا بپارێزێت.