عەلی قەرەداخی: جێبەجێکردنی ڕێککەوتنی مەزڵووم عەبدی و ئەحمەد شەرع ئەرکێکی شەرعیە

ئاڤا نیوز

عەلی قەرەداخی، كەسایەتیی ئایینی و سەرۆكی یەكێتیی جیهانیی زانایانی موسوڵمان، بانگەوازێكی خێرا ئاراستەی لایەنە ناكۆكەكانی سووریا دەكات بۆ ڕاگرتنی شەڕ و خوێنڕشتن و ئەنجامدانی گفتوگۆ لەپێناو چارەسەركردنی كێشە و ناكۆكییەكان لەچوارچێوەی "سووریایێكی یەكگرتوودا".

بانگەوازی فەرمی: د. عەلی قەرەداخی، كەسایەتیی ئایینی و سەرۆکى یەكێتیی جیهانیی زانایانی موسوڵمان و سەرۆكی ڕابیتەی مرۆیی لە لاپەڕەی فەرمیی خۆی بانگەوازێكی بڵاوكردووەتەوە و دەڵێت، داوا لە لایەنە ناكۆكەكانی سووریا دەكەم، شەڕ و كوشتار ڕابگرن، لەپێناو ئاشتەوایی گشتگیر و بونیادنانی سووریایێكی نوێ تێبكۆشن.

قەرەداغی داوایەكی تایبەت لە حكومەتی نوێی سووریا و هەسەدە دەكات، پابەندی ئەو ڕێككەوتنە بن كە لەنێوانیاندا واژۆ كراوە و پەلە بكەن لە جێبەجێكردنی بڕگەكانی بە نیازێکی پاک و لەچوارچێوەی سووریایەکی یەکگرتوو، کە مافە ڕەواکانی گەلی کوردی تێدا دەستەبەرکرابێت.

زانیاریی زیاتر: قەرەداخی دەڵێت، لە سەرەتای شۆڕشی سووریا لە 2011ـەوە، بەهەموو توانامەوە پشتیوانی و پاڵپشتیی گەلی سووریام كردووە و لەڕێگەی ڕابیتە هاوكاریی ئاوارەكانی ئەو وڵاتەمان كردووە كە پەنایان بۆ هەرێمی كوردستان هێناوە، هەروەها چانسی خوێندنمان بۆ زۆرترین قوتابیی سووری لە زانكۆی گەشەپێدانی مرۆیی لە هەرێمی كوردستانی عێراق ڕەخساندووە و پرۆژەكەش بەردەوامە.

دووپاتیشی دەكاتەوە، هەوڵێكی زۆری داوە بۆ ئاشتەوایی و نزیككردنەوەی لایەنە ناكۆكەكان و جێبەجێكرنی ڕێككەوتنی پێشووی نێوان دیمەشق و هەسەدە.