دۆخەکە خراپە؛ ئەمریکا و ئێران لە جووڵەدان

ئاڤا نیوز

سەرچاوە هەواڵییەکان ئاماژە بە جموجۆڵێکی چڕی هێزە ئاسمانییەکانی ئەمریکا دەکەن لە دوو ناوچەی جیاوازی جیهان، فەرماندەی سوپای پاسدارانی ئێران ڕایگەیاند، وڵاتەکەی لە لووتکەی ئامادەباشیدایە بۆ وەڵامدانەوە.

زانیاریی بەدەستهاتوو: بەپێی زانیارییەکان، 8 فڕۆکەی پڕکردنەوەی سووتەمەنی لە بنکەی سەربازیی پیرڵ هاربۆر لە هاوایی ئەمریکا فڕیون. هاوکات لەگەڵ ئەم جوڵەیە، 6 فڕۆکەی دیکەی پڕکردنەوەی سووتەمەنی فڕۆکە جەنگییەکانی ئەمریکا لە بنکەی ئاسمانیی عودەیدە لە وڵاتی قەتەر بەڕێکەوتوون.

فڕینی ئەم ژمارە زۆرەی فڕۆکەی پڕکردنەوەی سووتەمەنی لە یەک کاتدا، سەرنجی چاودێرانی سەربازیی ڕاکێشاوە، کە زۆرجار ئەم جۆرە فڕۆکانە بۆ پشتیوانیکردنی فڕۆکە جەنگییەکان لە ئەرکە دوورمەوداکاندا بەکاردەهێنرێن.

لێدوانی فەرمی: دۆناڵد ترەمپ، سەرۆکی ئەمریکا ڕایگەیاند، پێمان وتراوە کوشتنی خەڵک لە ئێران وەستاوە، ئەم شتە وەستاوە، هیچ پلانێک بۆ لەسێدارەدان دانەنراوە، ئەوەم پێم وتراوە، دواتر دەزانین ڕاستە یان نا.

بۆچوونی لایەنی بەرامبەر: محەممەد پاکپوور، فەرماندەی سوپای پاسدارانی ئێران ڕایگەیاند، وڵاتەکەی لە لووتکەی ئامادەباشیدایە بۆ وەڵامدانەوەی یەکلاکەرەوە بۆ هەر هێرشێک، هاوکات ئەمریکای تۆمەتبار کرد بەوەی لە پشت ئەو خۆپیشاندانانەوەن کە وڵاتەکەی گرتووەتەوە.

لەلایەکی دیکەوە: هەریەکە لە ئەڵمانیا، ئیسپانیا و پۆڵەندا داوایان لە هاووڵاتیانیان کردووە خێرا ئێران بەجێبهێڵن، بۆ ئەوەی تووشی هیچ مەترسییەک نەبنەوە.