ساڤایا: سزای نوێ بۆ کەس و بانکەکانی عێراق بەڕێوەیە

ئاڤا نیوز

نێردەی تایبەتی سەرۆکی ئەمریکا بۆ عێراق ڕایدەگەیێنێت، لەگەڵ وەزارەتی گەنجینە و نووسینگەی کۆنترۆڵکردنی سەرمایە بیانییەکان ڕێککەوتوون لەسەر ئەنجامدانی پێداچوونەوەیەکی گشتگیر بۆ سەرجەم مامەڵە داراییە گوماناوییەکانی ناو عێراق و جەختی کردەوە کە سزای نوێ بەڕێوەیە.

بڵاوکراوەی فەرمی: مارک ساڤایا، نێردەی تایبەتی سەرۆکی ئەمریکا بۆ عێراق لە هەژماری فەرمی خۆی لە ئێکس بڵاویکردووەتەوە،  ئەم ڕێکارانە ئەو تۆڕ و لایەنانە دەکەنە ئامانج کە تێوەگلاون لە قاچاخچێتی، سپیکردنەوەی پارە و دابینکردنی بودجە بۆ چالاکییە تیرۆریستییەکان، تاوەکو یەکپارچەیی سیستەمی دارایی و دەسەڵاتی دەوڵەت بپارێزرێت.

لەم کۆبوونەوەیەدا باس لە ئاستەنگەکانی چاکسازی لە بانکە حکومی و تایبەتەکان کراوە و هەردوولا هاوڕابوون لەسەر بەهێزکردنی لێپرسینەوەی دامەزراوەیی و شەفافیەت.

زانیاریی زیاتر: نێردەی تایبەتی سەرۆکی ئەمریکا ڕوونی کردەوە کە پێداچوونەوەکە تۆماری پارەدانی ئەو کۆمپانیا و کەسانە دەگرێتەوە کە لە پڕۆژە داراییە فرتوفێڵاوییەکاندا بەشدارن، ئەمەش وەک هەوڵێک بۆ ڕێگریکردن لە هەر هەوڵێک کە سەقامگیریی ئابووریی وڵات بخاتە مەترسییەوە و یەکپارچەیی دامەزراوە بانکییەکان بپارێزێت.

ساڤایا دووپاتی کردەوە کە پەیوەندییەکانی نێوان واشنتن و بەغدا لە سایەی سەرکردایەتیی دۆناڵد ترەمپدا لە هەموو کات بەهێزترن.