دژی هێرشەکان لە حەلەب لەبەردەم بنکەی هاوپەیمانان لە حەسەکە مانگرتن لە خواردن ڕادەگەیێنرێت

ئاڤا نیوز

بەشێک لە هاووڵاتیانی ڕۆژئاوای کوردستان دژی بێدەنگی وڵاتان لەبەرامبەر هێرشەکانی گرووپە چەکدارەکانی سوپای عەرەبی سووریا بۆ سەر گەڕەکە کوردییەکانی حەلەب و بەردەوامی پێشێلکارییەکانیان لە ڕۆژهەڵاتی حەلەب، لەبەردەم بنکەی هێزەکانی هاوپەیمانی نێودەوڵەتی لە حەسەکە مانگرتیان لە خواردن ڕاگەیاندووە.

لێدوانی فەرمی: عەبدولباقی عەبدولڕەحمان و بوشرا کوردی، دوو لە مانگرتووانی بەردەم بنکەی هاوپەیمانانی نێودەوڵەتی دژی داعش لە حەسەکە، قسەیان بۆ میدیاکانی ڕۆژئاوای کوردستان کردووە و دەڵێن، دەیانەوێت جیهان بەرامبەر ئەو کوشت و بڕ و تاوانانە بێتە دەنگ کە ماوەی 14 ساڵە لەلایەن گرووپەکانی نزیک لە تورکیا (کە ئێستا بەشێکن لە سوپای عەرەبی سووریا) بەرامبەر کورد دەیکەن، لەکاتێکدا کورد لەسەر خاکی خۆی دەژی و هیچ کات هێرشی نەکردووەتەسەر خاکی خەڵکی دیکە.

زانیاریی زیاتر: بەگوتەی ئەو دوو مانگرتووە، کورد و پێکهاتەکانی دیکەی باکوور و ڕۆژهەڵاتی سووریا بە نوێنەرایەتی جیهان شەڕی دژی داعشیان کرد، بەڵام ئەمڕۆ کە ڕووبەڕووی هێرش و پەلاماردان دەبنەوە، وڵاتانی جیهان دەستوەردان ناکەن، بۆیە داوا لە نەتەوە یەکگرتووەکان، هاوپەیمانی نێودەوڵەتی و دەستەکانی مافی مرۆڤ دەکەن ڕێکاری کرداری دژی ئەو تاوانانە بگرنەبەر کە بەرامبەر گەلی کورد دەکرێت، داوا دەکەن ئەم هێرشانە سەرکۆنە بکرێن و مافەکانی لە شێخ مەقسوود و ئەشرەفیەی حەلەب بۆ بگەڕێتەوە.