ئەنجوومەنی باڵای فەتوا: وەرگرتنی کەم و زیاد لە ئاڵوگۆڕی دۆلاری سپی و شین دروست نییە

ئاڤا نیوز

ئەنجوومەنی باڵای فەتوا لەسەر شێوازی ئاڵوگۆڕی دۆلاری ئەمریکی بەرامبەر بە دیناری عێراقی هاتە دەنگ، ئاماژە بەوە دەدات جیاوازی ئەو مامەڵەیەی بەرامبەر هەردوو دۆلاری شین و سپی شەرعی نییە، وەرگرتنی زیاد و کەم لە ئاڵۆڕگۆڕکردنیان دروست نییە.

وێنە گەورەکە: دابەزینی بەهای دینار بەرامبەر دۆلار لە بازاڕەکانی ئاڵوگۆڕی دراو لە هەرێمی کوردستان، جۆرێک لە جیاوازی دروستکردووە بەشێوەیەک دۆلاری سپی بەهۆی ئەوەی کۆنە، بە پارەی کەمتر کە جیاوازییەکە 5 بۆ 7 هەزارە بەرامبەری دیناری عێراقی ئاڵوگۆڕ دەکرێت.

لێدوانی فەرمی: د. عەبدوڵڵا شێرکاوەیی، وتەبێژی یەكێتی زانایانی ئاینی ئیسلامی کوردستان؛ بە ئاڤای گوت، "جیاوازی کردن لە نێو دۆلاری سپی و شین، گۆڕینەوەیان بە پارەی کەمتر، بە گەڕانەوە بۆ دەقە شەرعییەکان دروست نییە و حەرامە، مەرجە گۆڕینه‌وه‌ی دۆلاری سپی به‌ دۆلاری شینی ئه‌مریكی پێویسته‌ ده‌ست به‌ ده‌ست بێت و بێ‌ زیاده‌ و كه‌می بگۆردرێن به‌یه‌كتری، چونكه‌ هه‌ردووكیان یه‌ك ڕه‌گه‌زن و له‌یه‌ك جۆری دراون."

لەلایەکی دیکەوە: سەبارەت بەو کەسانەی کە قەرزیان لای خەڵکە و قەرزەکەیان بە دۆلاری سپی وەردەگرنەوە ئەو زیادانەش هەژمار دەکەن، وتەبێژی یەكێتی زانایانی ئاینی ئیسلامی کوردستان ئاماژەی بەوەدا کە ئەو مامەڵەیەش دروست نییە، دەبێت بە نرخی گشتیی هەژمار بکەن، نابێت کەم و زیادی وەرگرێتەوە.

بەگوێرەی ڕێنمایی ئەنجوومەنی باڵای فتوا ده‌رچه‌ی شه‌رعی له‌م واقیعه‌ی كه‌ هه‌یه‌، ئه‌وه‌یه‌: ئه‌گه‌ر كه‌سێك ویستی دۆلاری سپی بگۆرێت به‌ دۆلاری شین، پێویسته‌ دۆلاره‌ سپیه‌كه‌ بفرۆشێت به‌جۆرێكی دیكه‌ له‌دراو، ئینجا به‌و دراوه‌ دۆلاری شین بكڕێت.