نەوت لە سەنتەری شارەکان دابەش دەکرێت

ئاڤا نیوز

ڕۆژی شەممەی داهاتوو، دابەشکردنی نەوت لە سەنتەری شاری هەولێر دەستپێدەکات، هەر خێزانێک 100 لیتر نەوتی پێدەدرێت.

وێنە گەورەکە: ساڵانە لەگەڵ نزیکبوونەوەی وەرزی سەرما، حکومەتی هەرێمی کوردستان لە ناوچە شاخاوییەکان و ناو شارەکان دابەشکردنی نەوت  بە نرخی پاڵپشتیکراو  دەستپێدەکات.

لێدوانی فەرمی: سالار محەممەد، لێپڕسراوی بەشی پشکنین لە بەڕێوەبەرایەتیی نەوت و کانزاکانی هەولێر، بە ئاڤای گوت: ڕۆژی شەممە 17-1-2026 لە سەنتەری شەری هەولێر نەوتی سپی بەسەر هاونیشتمانیان دابەش دەکرێت، سەرەتاش لە بنکەی خۆراکی 207ـی ناوشار دەست پێدەکات و هەر خێزانێک بڕی 100 لیتر نەوتی بە 31 هەزار دینار پێدەدرێت، بۆ ئەم مەبەستەش بڕی حەوت ملیۆن و 500 هەزار لیتر نەوت ئامادەکراوە.

لەلایەکی دیکەوە: سەلام عومەر، گوتەبێژی نەوت و کانزاکانی سلێمانی بە ئاڤای گوت، ئەو نەوتەی لە عێراقەوە بۆ هەرێمی کوردستان ڕەوانە دەکرێت بەشی هەردوو پارێزگای سلێمانی و هەڵەبجە زیاتر لە 20 ملیۆن لیترە، نووسراومان کردووە بۆ ئەوەی ئەو بڕە نەوتە وەربگرین بەڵام هێشتا ڕەوانە نەکراوە، هەر کاتێک نەوتەکە بگات لە سەنتەری هەردوو شاری سلێمانی و هەڵەبجە دابەش دەکرێت.

کارزان ڕەئووف، بەڕێوبەری نەوت و کانزاکانی دهۆک بە ئاڤای گوت، دوای ئەوەی ئەو بڕە نەوتەی لە عێراقەوە وەک بەشە نەوتی هەرێمی کوردستان ڕەوانە کراوە، زیاتر لە 10 ملیۆن و 700 هەزار بۆ پاریزگای دهۆکە، دوای گەیشتنی ئەو بڕە نەوتەش لە 8-1-2026 ـەوە دەستمان بە دابەشکردنی نەوت لە سەنتەری شاری دهۆک کردووە.