ڕۆژئاوای کوردستان دەروازەکانی بە ڕووی سووریادا داخست

ئاڤا نیوز

ئیدارەی خۆسەری باکوور و ڕۆژهەڵاتی سووریا بڕیاری داخستنی تەواوی دەروازە سنوورییەکانی لە ناوچەکانی تەبقا، ڕەققە و دێرەزور ڕاگەیاند.

نووسراوی فەرمی: بەپێی نووسراوێکی فەرمیی ئاسایشی دەروازەکان، سەرجەم دەروازەکان تا کاتێکی نادیار داخراون. بڕیارەکە تەنیا حاڵەتە مرۆییە کتوپڕەکان و چالاکیی ڕێکخراوە مرۆییە نێودەوڵەتییەکان ناگرێتەوە، کە وەک پێویستییەک بۆ گەیاندنی هاوکارییەکان بە کراوەیی دەمێننەوە.

ئەم پێشهاتە دوای ئەوە دێت کە پێکدادان و گرژییە سەربازییەکان لە سنوورەکانی نێوان هەردوولا تووندبوونەتەوە و پڕۆسەی هاتووچۆی مەدەنییان پەکخستووە.

بەڕێوەبەرایەتیی خۆسەر بەرپرسیارێتیی ئەم داخستنە دەخاتە ئەستۆی حکومەتی سووریا و ئاماژە بەوە دەکات کە ئەم ڕێکارە بۆ دوورخستنەوەی مەترسییەکانە لە گیانی مەدەنییەکان و کارمەندانی دەروازەکان، تا ئەو کاتەی سەقامگیریی ئەمنی بۆ ناوچەکە دەگەڕێتەوە. جەختیش دەکاتەوە کە ئەمە هەنگاوێکی پارێزگارییە بۆ ڕێگریکردن لە هەر پەرەسەندنێکی دیکە کە کاریگەریی ڕاستەوخۆ لەسەر ژیان و سەلامەتیی هاووڵاتییان لە سنوورەکاندا دروست دەکات.