فڕۆکە بێفڕۆکەوانەکان بە ئاسمانی بەنداوی تشریندا دەسووڕێنەوە

ئاڤا نیوز

فڕۆکە بێفڕۆکەوانەکانی گرووپە چەکدارەکانی سەر بە حکومەتی سووریا و تورکیا، بە چڕی بە ئاسمانی ناوچەی بەنداوی تشرین لە کانتۆنی فووراتدا دەسووڕێنەوە؛ ئەمەش وەک ئاماژەیەک بۆ پەرەسەندنی ئەگەری پێکدادانی سەربازی دەبینرێت.

وێنە گەورەکە: بەنداوی تشرین یەکێکە لە گرنگترین ژێرخانە ستراتیژییەکانی وزە و ئاو لە باکوور و ڕۆژهەڵاتی سووریا. جووڵەی چڕی درۆنەکان بەسەر ئەم ناوچەیەدا، دوای زنجیرەیەک هێرش دێت کە لە 6ـی کانوونی دووەمەوە بۆ سەر گەڕەکەکانی شێخ مەقسوود، ئەشرەفییە و دێر حافر دەستیپێکردووە.

زانیاریی زیاتر: ئێستا ئەگەری ڕووبەڕوو بوونەوەی نوێ لە نزیک بەنداوی تشرین هەیە فڕۆکەی بێفڕۆکەوان بە بەردەوامی بەسەر ئاسمانی ئەو ناوچەیە دەسوڕێتەوە. 

لەلایەکی دیکەوە: ئاژانسی ئانهای نزیک لە هەسەدە بڵاویکردەوە: دوو فڕۆکەی بێفڕۆکەوانی خۆکوژی لە گوندی حاج حسێن و گردی سیریتەل لە نزیک بەنداوی تشرین لە پارێزگای فورات تەقێنراونەتەوە و هیچ زیانێکی گیانی نەبووە.

ئەوەی پێویستە بیزانیت: لە ماوەی دە ڕۆژی ڕابردوودا، ئاستی گرژییەکان لە باکووری سووریا گەیشتووەتە لوتکە. حکومەتی سووریا و هاوپەیمانە هەرێمییەکانی دەیانەوێت سوود لە گۆڕانکارییەکانی حەلەب وەربگرن بۆ پاشەکشەپێکردنی هێزەکانی سووریای دیموکرات لەو ناوچانەی کە کلیلی وزە و ئاوی وڵاتەکەیان لەدەستە.