ڕوونکردنەوەی بازرگانی عێراق لەبارەی "زیادبوونی گومرگی بەرهەمە خۆراکییەکان"

ئاڤا نیوز

وەزارەتی بازرگانی عێراق ڕەتیدەکاتەوە گومرگی هاوردەکردنی بەرهەمە خۆراکییە بنەڕەتییەکان زیادکرابێت، هۆشداریش دەداتە ئەوانەی یاریی بە نرخەکان و قۆرخکاریی دەکەن و دەڵێت، ڕووبەڕووی یاسا دەکرێنەوە.

لێدوانی فەرمی: محەممەد حەنوون، وتەبێژی وەزارەتی بازرگانی عێراق بە ئاژانسی هەواڵی فەرمی ڕاگەیاند، لیژنەکانی چاودێری بازار هەوڵەکانیان چڕکردووەتەوە و هەر کەسێک نرخی کاڵا بەگشتی و بەرهەمە خۆراکییەکان بەتایبەتی بەرزبکاتەوە، بەهامەهەنگی هێزە ئەمنییەکان ڕووبەڕووی یاسای دەکەنەوە.

دەشڵێت، حکومەت هیچ پێناسێکی گومرگی لەسەر بەرهەمە خۆراکییە بنەڕەتییەکان زیادنەکردووە و نرخەکان وەک خۆیانن، بەرزبوونەوەی نرخی ئەو بەرهەمە خۆراکییانەش بۆ قۆرخکاریی لەلایەن بەشێک لە بازرگانان و یاریکردنیان بە نرخەکان لە بازاردا دەگەڕێتەوە.

ئەوەی پێویستە بیزانیت: بە وتەی وتەبێژی وەزارەتی بازرگانی عێراق سەرەڕای گرتنەبەری ڕێکاری یاسایی، هەوڵیش دراوە هاوردەکردنی ئەو ماددە خۆراکییانەی نرخیان لەبازاردا بەرزبووەتەوە، لە سنوورەکانەوە زیاتر بکرێت ئەویش بە ئامانجی ئەوەی خەڵک بتوانێت بە نرخی هەرزان و فەرمی ئەو ماددە خۆراکییانەی دەستبکەوێت.