لە گەرمیان مینی پاسێکی گواستنەوە وەردەگەڕێت؛ پێنج قوتابی بریندار بوون

ئاڤا نیوز

لە ناحیەی مەیدان لە سنووری ئیدارەی سەربەخۆی گەرمیان، لەکاتی گەڕانەوەیان لە قوتابخانە مینی پاسێک کە هاتووچۆی بە قوتابییەکان دەکرد وەرگەڕا و پێنج قوتابی زامدار بوون.

لێدوانی فەرمی: سامان عەلی، وتەبێژی هاتووچۆی گەرمیان بەئاڤای وت: "ڕووداوەکە کاتژمێر 2:00 دوای نیوەڕۆی ئەمڕۆ لە ناحیەی مەیدان، لە کاتی گەڕانەوەی قوتابییەکان بۆ ماڵەوە بەهۆی وەرگەڕانی مینی پاسێک کە حەوت سەرنشینی هەڵگرتبوو پێنج قوتابی برینداربوون."

وتەبێژی هاتووچۆی گەرمیان دەڵێت: "بەهۆی لە دەستدانی کۆنتڕۆڵ، ڕووداوەکە ڕوویداوە و لەلایەن تیمی هاتووچۆوە لێکۆڵینەوە و کاری هێڵکاریی بۆ ڕووداوەکە بەردەوامە."

زانیاریی زیاتر: بەگوێرەی ئەو زانیارییانەی دەست ئاڤا کەوتووە، بریندارەکان بەمەبەستی چارەسەرکردن ڕەوانەی نەخۆشخانەی شەهید مەلا ئەحمەد کەلاری کراون، لەناحیەی باوەنوور. برینی بریندارەکان سووکە.

ئەوەی پێویستە بیزانیت: سەرجەم سەرنشینەکانی مینی پاسەکە قوتابی بوونە، بریندارەکان بەنزیکەیی لە دایک بووی 2010ـن. سەرجەمیان دانیشتووی گوندی ئازادین لەناحیەی مەیدان.