دۆخی ڕۆژئاوای کوردستان مەترسیدارە و پلانێکی ئەحمەد شەرع دژی هەسەدە شکستی هێنا

ئاڤا نیوز

دۆخی ڕۆژئاوای کوردستان لە قۆناغێکی مەترسیداردایە، دوای شکستهێنانی پلانێکی ئەحمەد شەرع چاوەڕوان دەکرێت ئەمشەو یان سبەینێ شەڕێکی قورس و خوێناوی ڕووبدات. بەهۆی هەڵکشانی مەترسییەکانیش ڕۆژئاوای کوردستان سێ دەروازەی گەورەی لەگەڵ سووریا داخستووە.

چیرۆکی سەرەکی: دۆخی ڕۆژئاوای کوردستان و ناوچەکانی ژێر دەسەڵاتی هەسەدە تا دێت خراپتر و مەترسیدارتر دەبێت، بەتایبەت لە دێر حافر و مەسکەنە و بەنداوی تشرین. گرووپە چەکدارەکانی سەر بە حکومەتی سووریا و تورکیا، لە 24 سەعاتی ڕابردوودا هێرشەکانیان چڕتر کردووەتەوە بەتایبەت بە فڕۆکەی بێفڕۆکەوان.

ئەوەی ئێستا ڕوودەدات: بەپێی زانیارییە مەیدانییەکان، ئێستا هێزەکانی هەسەدە و گرووپە چەکدارەکان بەرامبەر یەک لە سەنگەرن، سوپای عەرەبی سووریا هەڕەشەی هێرشێکی تووند و یەکلاکەرەوە دەکات. زەنگی دەستپێکردنی هێرشەکەیشی لێداوە، چاوەڕوان دەکرێت دوای تەواوبوونی مۆڵەتە 8 کاتژمێرییەکە، ئەمشەو تا بەیانی شەڕێکی قورس و خوێناوی ڕووبدات.

مەترسیدارترین شوێن بۆ شەڕەکە دێر حافرە، زیاتر لە 100 هەزار کەس لەو شارۆچکەیە دەژین و زۆربەیان عەرەبن، لەگەڵ مەسکەنە و بەنداوی تشرین لەلایەن سوپای سووریا بە ناوچەی سەربازی داخراو دانراون.

پلانێکی شکستخواردوو: سوپای عەرەبی سووریا دوێنێ ڕایگەیاند بۆ پاراستنی خەڵک ڕێڕەوێکی مرۆیی دەکەنەوە. مۆڵەتێکی 8 کاتژمێریشی دانابوو لە کاتژمێر 09:00ی بەیانی ئەمڕۆوە بۆ کاتژمێر 05:00ی ئێوارە، بۆ ئەوەی خەڵک ناوچە سەربازییەکان چۆڵ بکەن، بەڵام ئەو پلانەی ئەحمەد شەرع، سەرۆکی سووریا و فەرماندەی گشتیی هێزە چەکدارەکان شکستی هێنا، بەدرێژایی ئەمڕۆ یەک کەس لە ڕێڕەوە مرۆییەکە دەرنەچوو.

هۆکارە زانراوەکان: سوپای عەرەبی سووریا هەسەدە تۆمەتبار دەکات بەوەی ڕێگری لە خەڵک کردووە لەڕێگەی ڕێڕەوەکەوە لەو ناوچانە دەرچن و بگوازرێنەوە بۆ شوێنێکی سەلامەت.

هەسەدەش ئەو تۆمەتە ڕەت دەکاتەوە و دەڵێت: خەڵک خۆیان ڕایان نەکردووە و ڕازی نەبوون بە زۆرەملێ ئاوارە بکرێن و لەژێر هەڕەشە و فشار ماڵ و حاڵیان جێبهێڵێن، چونکە هیچ متمانەیەکیان بە سوپای سووریا و گرووپە چەکدارەکان نییە.

ئێستا دۆخەکە ئاڵۆز و مەترسیدارە، سوپای سووریا و گرووپە چەکدارەکان هەزاران چەکداریان کۆکردۆتەوە، هەرچی چەکی قورس هەیانە هێناویانە بۆ هێرشکردنە سەر هەسەدە.

هەسەدەش سەنگەرەکانی قایم کردووە و هەڕەشە دەکات هەر هێرشێکیان بکرێتە سە بەتووندی وەڵامیان دەدەنەوە بۆ ئەوەی جارێکی تر بووێرییان نەبێت بیر لە داگیرکردنی ڕۆژئاوای کوردستان بکەنەوە.

نوێترین پێشهاتەکان: ئێوارەی ئەمڕۆ گرووپە چەکدارەکان بە دوو درۆنی بۆمبڕێکراو هێرشیان کردە سەر دەوروبەری بەنداوی تشرین.

٠ هەسەدە دەڵێت درۆنی بەیرەقداری تورکی بەشێوەیەکی چڕ و بەردەوام بەسەر ئاسمانی دێرحافر و مەسکەنەدا دەسووڕێننەوە.

٠ گرووپەکانیش جوڵەی گوماناوی دەکەن و ناوەناوە بە دۆشکە و هاوەن ناوچەکانی ژێر دەسەڵاتی هەسەدە تۆپباران دەکەن.

٠ کامتژمێر 6:30 خولەکی ئێوارە هەسەدە ڕاگەیێنراوێکی نوێی بڵاوکردەوە، ڕایگەیاند فڕۆکەیەکی بێفڕۆکەوانی جۆری ئاکنجی تورکی لە ئاسمانی دێر حافر بینراوە و دوو مووشەکی پێبووە، بەڵام هیچ هێرشێکی نەکردووە.

هەسەدە پێشبینی دەکات تەنها بۆ چاودێری و هەواڵگری هاتبێت. ئاماژە بۆ ئەوەش دەکات لە دوو ڕۆژی ڕابردوودا ئەم فڕۆکانە شەش هێرشیان کردۆتە سەر دێر حافر و مەسکەنە. 

٠ بەهۆی مەترسی شەڕ، ئیدارەی خۆسەری ڕۆژئاوای کوردستان سێ دەروازەی سەرەکی بەڕووی حکومەتی سووریا داخست بۆ کاتێکی نادیار، دەروازەکانی تەبقا و ڕەققە و دێرزوور. ئەم بڕیارە وەڵامێک بوو بۆ حکومەتی سووریا، حکومەتیش لەلایەن خۆیەوە دەروازەکانی داخستووە.

ئیدارەی خۆسەر دەڵێت بڕیارەکە بەهۆی هەڵکشانی ئاڵۆزییە ئەمنییە مەترسیدارەکانە بۆ پاراستنی سەلامەتیی کارمەندان و هاووڵاتییان و گەشتیاران. بڕیارەکە تەنیا حاڵەتە مرۆییە کتوپڕەکان و چالاکیی ڕێکخراوە مرۆییە نێودەوڵەتییەکان ناگرێتەوە.

لەلایەکی دیکەوە: لە بەرامبەر هەڕەشە و مەترسییەکان ڕۆهلات عەفرین، فەرماندەی یەپەژە بە ئاڤای ڕاگەیاند: ئامانجی سوپای سووریا داگیرکرنی هەموو ڕۆژئاوای کوردستانە، بەڵام ئێمە لە ئامادەباشیی تەواو داین، ڕادەستی سوپا نابین و ئامانجمانە خەڵک و دەستکەوتەکانمان بپارێزین.