سەدر "سەرایا سەلام" هەڵدەوەشێنێتەوە؛ داوای لێبوردن لە سوپا و وەزارەتی ناوخۆ دەکرێت

ئاڤا نیوز

موقتەدا سەدر، ڕێبەری ڕەوتی نیشتمانیی شیعە، لە کاردانەوەی پێکدادانەکانی بەغدا، زنجیرەیەک بڕیاری توندی بۆ "سزادان و چاکسازی" لە ناو باڵە سەربازییەکەی (سەرایا سەلام) دەرکرد؛ تێیدا فەرمانی هەڵوەشاندنەوەی تەواوی پێکهاتەی ئەو هێزەی دا.

وێنە گەورەکە: ئەم بڕیارە دوای ئەوە دێت کە نۆ چەکداری سەرایا سەلام لەلایەن هێزە ئەمنییەکانەوە دەستگیرکران دوای ئەوەی لە ڕۆژانی ڕابردوو ڕووبەڕووی هێزە ئەمنییەکان بوونەوە و ترس و دڵەڕاوێکی زۆریان لە دڵی هاووڵاتییانی بەغدا دروستکرد. سەدر دەیەوێت بەم هەنگاوە پەیامێکی "دەوڵەتگەرایی" بنێرێت و بیسەلمێنێت کە ڕێگە نادات هیچ هێزێکی چەکدار، تەنانەت ئەوانەی سەر بە خۆشن، ڕووبەڕووی دامەزراوە فەرمییەکانی وەک سوپا و پۆلیس ببنەوە.

چیرۆکی سەرەکی: گرنگترین خاڵەکانی بەیاننامەکەی موقتەدا سەدر بریتین لە:

هەڵوەشاندنەوە: تەواوی پێکهاتەی سەرایا سەلام (جگە لە سامەڕا) هەڵدەوەشێتەوە و بۆ ماوەی ساڵێک دووبارە ڕێکدەخرێنەوە.

داوای لێبوردن: ناردنی وەفدێکی فەرمی بۆ لای سوپا و وەزارەتی ناوخۆ بۆ داوای لێبوردن و چاککردنی پەیوەندییەکان.

داماڵینی ئیمتیازات: گەڕاندنەوەی سەرجەم باج، ناسنامە و ئۆتۆمبێلە سەربازییەکان بۆ مەڵبەندەکان (تەنیا ئەو هێزانە بەدەرن کە لە بەرەی جەنگی تێرۆردان).

بەڵێننامەی نووسراو: هەموو سەرکردایەتییەکانی سەرایا سەلام دەبێت بەڵێننامەی فەرمی بدەن کە هەرگیز سەرپێچیی بەرامبەر دەوڵەت دووبارە نەکەنەوە.

ئەوەی پێویستە بیزانیت: موقتەدا سەدر هۆشداریی داوە کە هەر سەرپێچییەک لەمەودوا تەنیا بە دوورخستنەوە لە ڕەوتەکە کۆتایی نایەت، بەڵکو سەرپێچیکاران ڕادەستی دادگا دەکرێن تاوەکو بەپێی یاسا سزای توند بدرێن.