هەفتەی داهاتوو نەوتی سپی لە کۆیە دابەش دەکرێت

ئاڤا نیوز

بڕیارە لە هەفتەی داهاتووەوە پڕۆسەی دابەشکردنی نەوتی سپی لە سنووری قەزای کۆیە دەستپێبکات؛ قایمقامیەتی قەزاکەش ئاگادارییەکی بەپەلە بۆ ئەو خێزانانە بڵاودەکاتەوە کە هێشتا کارتی ئەلیکترۆنیی سووتەمەنییان نییە.

چیرۆکی سەرەکی: قایمقامیەتی کۆیە داوا لە هاووڵاتییان دەکات بە زووترین کات سەردانی بریکارەکانی خۆراک بکەن بۆ وەرگرتنی کارتی ئەلیکترۆنیی نەوت. هەر خێزانێک کارتەکەی ئامادە نەبێت، لەم بەشە نەوتە بێبەش دەبێت و ناوی بۆ قۆناغەکانی داهاتوو دوا دەکەوێت.

زانیاریی زیاتر: هەفتەی داهاتوو لە سنووری قەزای کۆیە نەوتی سپی بەسەر هاووڵاتییان دابەش دەکرێت، کە بڕی 100 لتر نەوت بە نرخی 31 هەزار دینارە، هەر خێزانێک کارتی سووتەمەنی نەبێت، لە وەرگرتنی بەشە نەوتەکەی بێ بەش دەبێت، بۆیە پێویستە لەڕێگەی بریکارەکانەوە کارتی ئەلیکترۆنی دەربهێنن.