نێردەی تایبەتی ترەمپ بەرەو بەغدا بەڕێدەکەوێت

ئاڤا نیوز

مارک ساڤایا، نێردەی تایبەتی سەرۆکی ئەمریکا بۆ کاروباری عێراق، ئامادەکاری بۆ سەردانێکی فەرمی و چاوەڕوانکراو بۆ بەغدا دەکات؛ ئەمەش دوای گەیشتن بە ڕێککەوتنێکی ستراتیژی لەگەڵ لوتکەی فەرماندەیی سەربازی و ئەمنیی کۆشکی سپی.

چیرۆکی سەرەکی: ساڤایا پێش بەڕێکەوتنی، زنجیرەیەک کۆبوونەوەی ئاستبەرزی لە کۆشکی سپی ئەنجامداوە لەگەڵ پێیت هیگسێس (وەزیری بەرگری/جەنگ) و سێباستیان گۆرکا (بەڕێوەبەری دژەتیرۆر) کۆبووەتەوە، ئەمەش بۆ جێبەجێکردنی ئەو پرسە ستراتیژییانەی کە لە واشنتن لەسەری ڕێککەوتوون و کۆبوونەوە لەگەڵ دەسەڵاتدارانی عێراق، نێردەکەی ترەمپ پەیامەکەی بە دروشمی "با جارێکی دیکە عێراق مەزن بکەینەوە" (Make Iraq Great Again) کۆتایی پێهێناوە.

بۆچی گرنگە: مارک ساڤایا سێیەم نێردەی کاریگەر و مێژوویی ئەمریکایە بۆ عێراق؛ ئەو وەک درێژکراوەی قۆناغەکانی پۆل بریمەر (2003) و بریت ماکگۆرک (2014) دەبینرێت. دەستنیشانکردنی لەم کاتەدا ئاماژەیە بۆ ئەوەی کە ترەمپ دەیەوێت بە شێوەیەکی ڕاستەوخۆ و لە ڕێگەی نێردەیەکی تایبەتەوە چاودێریی وردی مەلەفە ئەمنی و سیاسییەکانی عێراق بکات.

ئەوەی پێویستە بیزانیت: ساڤایا لە 19-10-2025ـەوە بە بڕیارێکی فەرمیی دۆناڵد ترەمپ دەستبەکار بووە. سەردانەکەی بۆ بەغدا لە کاتێکدایە کە ناوچەکە بە گشتی و عێراق بەتایبەتی لەبەردەم گۆڕانکاریی سیاسیی گەورەدایە و چاوەڕوان دەکرێت مەلەفی "مانەوەی هێزەکانی ئەمریکا" و "بەرەنگاربوونەوەی تێرۆر" تەوەری سەرەکیی دیدارەکانی بن.