سوپای عەرەبی سووریا "دوایین مۆڵەت" بە دانیشتوانی دێر حافر دەدات

ئاڤا نیوز

سوپای عەرەبیی سووریا مۆڵەتی بەکارهێنانی ڕێڕەوی مرۆیی لە دێر حافر و دەوروبەری تاوەکو کاتژمێر پێنجی ئێوارەی ئەمڕۆ هەینی درێژکردەوە؛ ئەمە وەک دوایین زەنگ و هۆشداری دەبینرێت پێش دەستپێکردنی ئۆپراسیۆنێکی سەربازیی گەورە بۆ سەر ناوچەکە.

ڕاگەیێنراوی فەرمی: سوپای عەرەبی سووریا ڕایگەیاند، بە مەبەستی ڕەخساندنی دەرفەتی زیاتر بۆ چوونە دەرەوەی هاووڵاتییانی مەدەنی لە ناوچەی دێرحافر و دەوروبەری، لە ڕۆژهەڵاتی حەلەب، بەکارهێنانی ڕێڕەوە مرۆییەکەی تاوەکو کاتژمێر پێنجی ئێوارەی ئەمڕۆ درێژکردووەتەوە.

٠ هەر بە بەگوێرەی ڕاگەیەندراوەکە،  هەر گردبوونەوە و گرووپێک ڕێگری لە دەرچوونی هاووڵاتییان بکات، دەکرێتە ئامانجی سەربازی، هاوکات ئەم هەنگاوەشی وەک ئامادەکارییەک بۆ دەستپێکردنی هێرشێکی سەربازیی فراوان بۆ سەر شارۆچکەی دێر حافر و دەورووبەری.

پەیوەست بەم بابەتەوە: ئیدارەی خۆجێی دێر حافر سەر بە دیمەشق، تاوەکو ئێستا نزیکەی 4 هەزار کەس شارۆچکەکەیان جێهێشتووە و گەیشتوونەتە ناوچەکانی ژێر دەسەڵاتی سوپاکەی ئەحمەد شەرع. 

لەلایەکی دیکەوە: پێشتر سوپای عەرەبی سووریا ئەم ڕێڕەوە مرۆییی کردەوە و مۆڵەتێکی 8 کاتژمێریشی دانابوو کە لە کاتژمێر 09:00ی بەیانی دوێنێ پێنجشەممە بۆ کاتژمێر 05:00ی ئێوارەی هەمان ڕۆژ، بۆ ئەوەی خەڵک ناوچە سەربازییەکان چۆڵ بکەن، بەڵام ئەو پلانە بۆ چۆڵکردنی ناوچەکە شکستی هێنا و بەدرێژایی دوێنێ یەک کەس لە ڕێڕەوە مرۆییەکە دەرنەچوو.

ئەوەی پێویستە بیزانیت: دێر حافر شارۆچکەیەکی ستراتیژییە و دەکەوێتە سەر شاڕێگەی سەرەکیی نێوان حەلەب و ڕەققە. کۆنتڕۆڵکردنی ئەم ناوچەیە لەلایەن سوپای عەرەبی سووریاوە، واتا کورتکردنەوەی مەودای گەیشتن بە بەنداوی تشرین و بڕینی هێڵەکانی گەیاندنی هەسەدە لەنێوان کانتۆنەکانی باکوور و ناوەڕاستی سووریا.