وەزارەتی خوێندنی باڵا گۆڕانکاری لە ژمارەیەک ڕێنمایی خوێندنی ماستەر و دکتۆرا دەکات

ئاڤا نیوز

ئەنجوومەنی وەزارەتی خوێندنی باڵا، لە یەکەم کۆبوونەوەی ئاسایی خۆی لە ساڵی نوێدا، گفتوگۆی لەبارەی پێداچوونەوە و دەوڵەمەندکردنی زیاتری ڕێنماییەکانی کردنەوەی خوێندنی ماستەر و دکتۆرا کرد؛ هاوکات بڕیاردرا زانکۆکانی کوردستان، وەزارەتی خوێندنی باڵا لە سەرچاوەکانی داهات و خەرجییەکانیان ئاگادار بکەنەوە.

چیرۆکی سەرەکی: لە تەوەرێکی کۆبوونەوەکەدا، پرسی دارایی و داهات و خەرجیی زانکۆکانی کوردستان گفتوگۆی لەبارەوە کرا، بۆ ئەمەش دوای وەرگرتنی ڕا و پێشنیازی ئەندامانی ئەنجوومەنی وەزارەتی خوێندنی باڵا، بڕیاردرا زانکۆکانی کوردستان سەرچاوەکانی داهات و خەرجییەکانیان لە ڕاپۆرتێکدا ئاڕاستەی وەزارەت بکەن، بە مەبەستی گفتوگۆکردن لەگەڵ ئەنجوومەنی وەزیرانی کوردستان و لایەنە پەیوەندیدارەکانی حکومەتی هەرێمی کوردستان.

زانیاریی زیاتر: لەبارەی خوێندنی ماستەر و دکتۆرا، ئەنجوومەنی وەزارەت بڕیاریدا ساڵانە ڕاوندێکی نوێی خوێندنی باڵا لە زانکۆکانی کوردستان بکرێتەوە، هاوکات بڕیاردرا پێداچوونەوە بە چەند بڕگەیەکی ڕێنماییەکانی خوێندنی باڵا بکرێت و بەم شێوەیەی لێ بکرێت:

٠ لە تاقیکردنەوەی توانستی زانستی، ئەو بڕگەیە لادەبرێت کە هەر هەڵەیەک ڕاستییەک دەسڕێتەوە.

٠ لێخۆشبوون لە کرێی خوێندنی باڵا (دبلۆمی باڵا، ماستەر، دکتۆرا) بۆ خوێندکاران و قوتابیانی ناوچە کوردستانییەکانی دەرەوەی ئیدارەی هەرێمی کوردستان، لە چوارچێوەی ڕێنمایی و ڕێکارە یاساییەکاندا.

٠ هیچ کورسییەکی بەتاڵ دوای ڕاگەیاندنی ئەنجامەکان پڕ ناکرێتەوە.

٠ پێداچوونەوەی مەرجدار بۆ مەرجی زمانی ئینگلیزی لە بەشە زانستی و مرۆڤایەتییەکاندا.