کۆبوونەوەی شاندی هاوپەیمانی نێودەوڵەتی لەگەڵ هەسەدە کۆتاییهات

ئاڤا نیوز

ئێوارەی ئەمڕۆ هەینی، شاندیكی سەربازیی هاوپەیمانی نێودەوڵەتیی دژی داعش گەیشتە شارۆچکەی دێر حافر لە ڕۆژهەڵاتی شاری حەلەب و لەگەڵ بەشێک لە سەرکردەکانی هێزەکانی سووریای دیموکرات (هەسەدە) کۆبوونەوە.

لێدوانی فەرمی: فەرهاد شامی، وتەبێژی هەسەدە بە ئاژانسی فرانس پرێسی ڕاگەیاند، بەرپرسانی هەسەدە و هاوپەیمانی نێودەوڵەتی بە سەرۆکایەتی ئەمەریکا کۆبوونەوەیەکیان ئەنجامدا بۆ تاوتوێکردنی کەمکردنەوەی گرژی و توندووتیژییەکانی نێوان هەسەدە و سووپای سووریا لە دێر حافر.

زانیاریی بەدەستهاتوو: بەگوێرەی سەرچاوە ئەمنییەکان، فەرماندەیەکی سەربازیی ئەمریکی سەرکردایەتیی شاندەکەی هاوپەیمانان کردووە لە دێر حافر لەگەڵ سەرکردەکانی هەسەدە و یەکینەکانی پاراستنی ژنان لەوانەش ڕۆهلات عەفرین، سەرکردە لە یەکینەکانی پارستنی ژنان و چیا کۆبانێ، ئەندامی فەرماندەیی گشتی هەسەدە کۆبوونەتەوە.

لەلایەکی دیکەوە: ڕوانگەی سووری بۆ مافەکانی مرۆڤ لە چەند سەرچاوەیەکەوە ئاشکرای کردووە، کۆبوونەوەکە بۆ تاوتوێکردنی پێشهاتە ئەمنی و سیاسییەکانی ناوچەکە بووە، هاوکات بەرزکردنەوەی هەماهەنگی هاوبەشی نێوان هێزەکانی هاوپەیمانان و هەسەدە لەپێناو دەستەبەرکردنی سەقامگیری و ئاسایشی خەڵک و ناوچەکە بە تایبەتی ئەو ناوچانەی گرژی و ئاڵۆزییان هەیە تاوتوێ کراون.