خۆپیشاندانی لایەنگرانی گرووپە چەکدارەکانی عێراق بۆ پشتیوانیکردنی ئێران بەڕێوەچوو

ئاڤا نیوز

دەیان کەس لەلایەنگرانی حەشدی شەعبی لەبەردەم باڵەخانەی باڵیۆزخانەی ئێران لە بەغدا بۆ پاڵپشتیکردنی کۆماری ئیسلامی ئێران دژی ئەمریکا و ئیسرائیل گردبوونەوە.

چیرۆکی سەرەکی: ئەمڕۆ هەینی گردبوونەوەی لایەنگرانی حەشدی شەعبی و بەرەی مەقاوەمەی ئیسلامی بە دروشمی "لەناوچوون و بەرەنگاری بەرامبەر ئەمریکا و ئیسرائیل" لە بەغدا بەڕێوەچوو، هاوکات  لە پارێزگاکانی کەربەلا و نەجەف خۆپیشاندان بۆ پشتیوانیکردنی ئێران و سەرکۆنەی هەڕەشەکانی ئەمریکا کران.

ئەوەی پێویستە بیزانیت: لەماوەکانی ڕابردوودا هەریەک لە گرووپی چەکداری حیزبوڵڵای عێراقی و کەتائیبی سەید شوهەدا و جووڵانەوەی نوجەبا لەڕێگای ڕاگەیێنراوەوە پاڵپشتی تەواوەتی خۆیان بۆ کۆماری ئیسلامیی ئێران و دەربڕیوە.

لەلایەکی دیکەوە: هەر یەکە لە حکومەتی عێراق و هاوپەیمانیی چوارچێوەی هەماهەنگیی شیعەکان بە ڕاگەیێنراوی فەرمی دووپاتیان کردووەتەوە نایانەوێت ببن بە بەشێک لەو ئاڵۆزیانەی لەناوچەکدا هەیە، هاوکات ڕەتیان کردووەتە خاک و ئاسمانی عێراق بۆ هێرشکردنە سەر هیچ وڵاتێکی دراوسێ و ناوچەکە بەکاربهێنرێت.

زانیاریی بەدەستهاتوو: بەپێی زانیارییە تایبەتەکانی ئاڤا میدیا ئێستا سەرکردەکانی حەشدی شەعبی ئامادەکاری دەکەن تاوەکو خۆپیشاندانەکان لە ڕۆژانی داهاتوودا فراوانتر بکەن و بڕیارە سبەی شەممە لە شەقامی زەلال لەپێش باڵەخانەی ڕاگەیاندنی حەشدی شەعبی لە بەغدا خۆپیشاندان ڕێکبخرێت.