هەسەدە: دێر حافر بە چڕی لەلایەن سوپای عەرەبی سووریاوە بۆردوومان دەکرێت

ئاڤا نیوز

دوای ماوەیەکی کەم لە دەرکردنی مەرسوومێکی هەشت خاڵی بۆ مافەکانی کورد لەلایەن ئەحمەد شەرعەوە. سوپای سووریا بە چڕی تۆپبارانی بۆسەر دێر حافر دەستپێکرد.

چیرۆکی سەرەکی: ئێوارەی ئەمڕۆ سوپای عەرەبی سووریا، بە ڕەنگی سوور چوار ناوچەی دێر حافری دەستنیشان کرد و داوای کرد خەڵک لەو ناوچەیە دووربکەونەوە، چونکە دەکرێنە ئامانج. ئەمەش وەک ئاماژەیەک بۆ هەبوونی بارەگای هەسەدە لەو ناوچانە.

ڕاگەیێنراوی فەرمی: ناوەندی ڕاگەیاندنی هێزەکانی سووریای دیموکرات ڕایگەیاند، گرووپەکانی سەر بە دیمەشق بە چڕی دەستیانکردووە بە بۆردوومان کردنی شاری دێر حافر. ئەو تۆپبارانە ناوچەی مەدەنی کردووەتە ئامانج و تا ئێستا زیانەکان نەزانراون.

لەلایەکی دیکەوە: ئاژانسی هەواڵی سووریا (سانا) لە زاری دەستەی کردە سەربازییەکانی سوپای عەرەبی سووریا بڵاویکردوەتەوە، "ئەوان وەڵامی هێرشێکی چەکدارانی پەکەکە و پاشماوەکانی ڕژێمی ئەسەدیان داوەتەوە".

ئەوەی پێویستە بیزانیت: دەستپێکردنی ئەو تۆپبارانە لە کاتێکدایە، ئەمڕۆ دوو کۆبوونەوە لەنێوان هەسەدە و هێزەکانی هاوپەیمانان لە ڕەققە و دێر حافر ئەنجامدراون و هێشتا ناوەرۆکی کۆبوونەوەکان ئاشکرا نەکراون، بڕیاریشە سبەی شەممە، لە هەولێر مەزڵووم عەبدی و تۆم باراک کۆببنەوە.